Oralda kólikti tehnıkalyq baıqaýdan ótkizetin maman jalǵan hattama úshin 120 myń teńgeden alyp otyrǵan

ORAL. QazAqparat - Qarjylyq monıtorıng agenttigi Oralda avtomobılderge qaýipsizdik hattamalaryn zańsyz berý dereginiń jolyn kesti, dep habarlaıdy QazAqparat.

Ótken jyldyń ózinde Qazaqstanda 13 myńnan astam jol-kólik oqıǵasy tirkelgen.

Apattardyń negizgi sebepteriniń biri - tehnıkalyq tekserý kezinde anyqtalýy tıis avtomobıldiń aqaýy.

Sonymen qatar, zańsyz aqshalaı syıaqy úshin jalǵan málimetteri bar avtokólikti tehnıkalyq tekserý týraly sertıfıkattar men hattamalar berý derekteri de bolyp jatyr.

Mysaly, Qarjylyq monıtorıng agenttiginiń Batys Qazaqstan oblysy boıynsha aýmaqtyq departamenti kólik quraldaryna oń qaýipsizdik hattamasyn berýge kómekteskeni úshin materıaldyq syıaqy alý dereginiń jolyn kesti.

«Ulttyq saraptama jáne sertıfıkattaý ortalyǵy» AQ Batys Qazaqstan oblysy boıynsha bólimshesiniń qyzmetkeri A.Gavrıshev 120 myń teńgege avtokólikterge QR ulttyq standartynyń talaptaryna sáıkes kelmeıtin qaýipsizdik hattamalaryn bergen.

Osylaısha, júrgizýshilerge de, jol qozǵalysynyń basqa qatysýshylaryna da qaýip tóndirgen.

A.Gavrıshev QK 247-babynyń 1-bóligi boıynsha qylmystyq jaýapkershilikke tartyldy.