Oralda kólikpen soqtyǵysqan mototsıkldiń 15 jastaǵy júrgizýshisi mert boldy
ORAL. QazAqparat – Oralda avtokólikpen soqtyǵysýdan aýrýhanaǵa túsken mototsıkl júrgizýshisi kóz jumdy, dep habarlaıdy QazAqparat tilshisi.
Búgin qala kósheleriniń birinde avtokólik mototsıklmen júrgen eki jasóspirimdi qaǵyp ketkenin jazǵan bolatynbyz.
Mototsıkldi tizgindep kele jatqan 15 jastaǵy bozbala oblystyq kópbeıindi aýrýhananyń jansaqtaý bólimine jatqyzylǵan edi.
Oblystyq Densaýlyq saqtaý basqarmasynyń baspasóz qyzmetinen málim etkenindeı, jasóspirimge ota jasalǵan. Alaıda alǵan jaraqattary aýyr bolǵandyqtan, ol qaza boldy.
"Qaıtqan jasóspirimmen birge bolǵan 15 jastaǵy qyz oblystyq kópbeıindi balalar aýrýhanasyna jetkizilgen. Jabyq bas-mı jaraqatyn alyp, mıy shaıqalǵan. Oǵan qosa, qoly synǵan. Jaǵdaıy qanaǵattanarlyq", - dedi basqarmadan.
BQO Polıtsııa departamenti baspasóz qyzmetiniń habarlaýynsha, Oralda jol-kólik oqıǵalary kóbeıip ketti.
Taǵy bir jol apaty 15 maýsym kúni saǵat 20.19-da A.Taımanov pen M.Yqsanov kósheleriniń qıylysynda boldy. Jolaýshy tasymaldaýmen aınalysatyn «Lada Granta» avtokóliginiń 45 jastaǵy júrgizýshisi 54 jastaǵy H. aıdap kele jatqan osyndaı kólikke jol bermeı, aýdarylyp qalǵan. Sonyń saldarynan ekinshi kóliktiń júrgizýshisi men 53 jastaǵy jolaýshy áıel jaraqat aldy.
