Oralda kólikpen adam qaǵyp ketken júrgizýshi sottaldy
ORAL. QazAqparat – BQO qylmystyq ister jónindegi mamandandyrylǵan aýdanaralyq sotynda avtokóligimen adamdy qaǵyp ketken júrgizýshige sot úkimi shyqty, dep habarlaıdy QazAqparat tilshisi.
Sýdıa Shara Zaınýllınanyń málim etkenindeı, A.Denısov QR QK 102-babyna sáıkes (qajetti qorǵanys sheginen shyǵý kezinde jasalǵan adam óltirý) aıypty dep tanyldy.
Sot talqysynda belgili bolǵanyndaı, jábirlenýshi óziniń tanystary B. jáne D-men oqıǵa bolǵanǵa deıin A.Denısov pen onyń B. jáne S. dostaryna qatysty top bolyp buzaqylyq jasaǵan.
A.Denısov ózderine qaýip tónýine baılanysty es-tússiz qalǵan dosy B-ny avtokóligine salyp alyp, oqıǵa ornynan sytylyp ketýge qam jasaǵan. Sol kezde jábirlenýshi avtokóliktiń aldynan shyǵyp, kapotyna sekirip minip alǵan. Sosyn dóńgelektiń astyna túsip, sol jerde jan tapsyrǵan.
Osylaısha A.Denısovtiń jazasy QR QK 99-baby 1-bóligi, ıaǵnı qasaqana adam óltirýden 102-bapqa (qajetti qorǵanys sheginen shyǵý kezinde jasalǵan adam óltirý) qaıta dárejelendi. Onyń qylmysy onsha aýyr emes qylmystar sanatyna jatady.
Sot A.Denısovtiń jazasyn jeńildetetin mán-jaı retinde onyń jasóspirim balasy bar ekendigin eskerdi. Sóıtip ol 1 jylǵa bas bostandyǵynan aıyrý jazasyn qaýipsizdigi barynsha tómen qylmystyq-atqarý júıesi mekemesinde óteýge sottaldy.
2019 jyldyń 2 qyrkúıeginen bıylǵy 19 naýryzǵa deıingi kúzetpen ustaý merzimindegi bir kúndi eki kúnge eseptegen sot oǵan taǵaıyndalǵan jaza ótelgen dep, Denısovti sot zalynan bosatty.
Jábirlenýshilerdiń azamattyq talaptary negizinde 3 mln teńge kólemindegi moraldyq jáne materıaldyq shyǵyn ishinara qanaǵattandyryldy.
Úkim zańdy kúshine engen joq.
