Oralda kólik elektr baǵanyna soǵylyp, aýdarylyp qaldy
ORAL. QazAqparat – Oralda avtokólik elektr baǵanyn soǵyp qulatty, dep habarlaıdy QazAqparat tilshisi.
Oqıǵa 23 shilde kúni tús mezgilinde D.Karbyshev kóshesi boıynda oryn aldy.
«Lada Kalına» avtokóligi temirbeton baǵanyna soǵylyp, ózi aýdarylyp qalǵan. Oqıǵa saldarynan taǵy eki elektr baǵany jol boıyna qulaǵan.
Osy mańda turatyn turǵyndardyń sózine qaraǵanda, beton baǵandar sapasyz, onyń ishinde temir armatýralar bolmaǵan, onyń ornyna symdar shyǵyp turǵan.
BQO polıtsııa departamentiniń baspasóz qyzmeti málim etkenindeı, jol-kólik oqıǵasy saldarynan zardap shekken bir adam jaraqat pýnktine jetkizildi.
Qazirgi tańda júrgizýshi men jolaýshynyń kim ekendigi anyqtalý ústinde.
Eske sala keteıik, budan buryn BQO-da Armenııadan ákelingen 300-den astam kólik ıeleri sary nómir alǵanyn jazǵan bolatynbyz.
