Oralda kólik basqarý quqyǵynan aıyrylǵan júrgizýshi avtobýs rýline otyrǵan
ORAL. QazAqparat - Oralda kólik basqarý quqyǵynan aıyrylǵan júrgizýshiniń avtobýs rýline otyrǵany anyqtaldy, dep habarlaıdy «QazAqparat» tilshisi.
BQO ІІD jergilikti polıtsııa qyzmetinen túsken málimetke qaraǵanda, «Avtobýs» jedel aldyn alý sharasy barysynda júrgizýshiniń kýáligi joq bolsa da, oǵan avtoparktegi laýazymdy qyzmetkerlerdiń avtobýs aıdaýǵa ruqsat bergeni belgili boldy. Atalǵan derek boıynsha júrgizýshi men laýazymdy qyzmetker ákimshilik jaýapkershilikke tartylyp, avtokólik arnaıy turaqqa qoıyldy.
«Avtobýs» sharasy 22 qańtar kúni bastalǵan bolatyn. Sol alǵashqy kúnniń ózinde 111 júrgizýshiniń jol erejesin buzǵandyǵy málim boldy.
«Avtobýs» sharasy 18 aqpanǵa deıin jalǵasady.
Aıta keteıik, jyl basynan beri avtobýstyń qatysýymen oblys kóleminde jol-kólik oqıǵasy tirkelgen joq. Al ótken jyly Oral qalasynda qoǵamdyq kóliktiń qatysýymen 16 jol-kólik oqıǵasy tirkelip, sonyń saldarynan 1 adam qaza taýyp, 86-sy túrli jaraqat alǵan bolatyn.
