Oralda qoqys jáshiginiń janynan óli tabylǵan shaqalaqtyń anasy ustaldy
ORAL. QazAqparat – Oralda qoqys konteıneriniń janynan óli tabylǵan náresteniń anasy ustaldy, dep habarlaıdy QazAqparat tilshisi.
Batys Qazaqstan oblystyq Polıtsııa departamentiniń baspasóz qyzmetinen túsken málimetke qaraǵanda, 6 qazan kúni tańerteń Qurmanǵazy kóshesindegi úılerdiń biriniń aýlasynda qoqys konteıneriniń janynan qara tústi sómke tabylǵan. Onyń ishindegi tsellofan pakette jańa týǵan shaqalaqtyń óli denesi bolǵan.
Múrde sot-medıtsınalyq saraptamaǵa jiberildi.
Abaı polıtsııa bóliminiń qyzmetkerleri jedel izdestirý sharalary barysynda Oral qalasynyń 1988 jylǵy turǵynyn anyqtap, ustady. Oqıǵa ornynan sómke, jamylǵy, 2 paket, 2 esik kilti, domofon kilti tabyldy.
Atalǵan derek boıynsha QR QK 100-babyna sáıkes (jańa týǵan balany anasynyń óltirýi) tergeý amaldary júrgizilýde.
Anyqtalǵandaı, áıeldiń budan basqa tórt balasy bar. Shaqalaqtyń qalaı ólgeni saraptama qorytyndysyna sáıkes anyqtalatyn bolady.
Eske sala keteıik, budan buryn Oralda qoqys konteınerinen shaqalaqtyń múrdesi tabylǵanyn jazǵan bolatynbyz.
