Oralda qoqys jáshiginen jańa týǵan shaqalaq tabyldy

ORAL. QazAqparat – Oral qalasynda qoqys jáshiginen jańa týǵan náreste tabyldy, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, oqıǵa 24 sáýir kúni boldy.

«Saǵat shamamen 11.31-de 102 operatoryna Nadejda kóshesi, 66-úıdiń artyndaǵy qoqys jáshiginde tsellofan paketke oralǵan shaqalaq tabylǵany jóninde habar tústi. Oqıǵa ornyna kelgennen keıin náresteniń ul bala ekendigi anyqtaldy. Ol shuǵyl túrde qalalyq kópbeıindi aýrýhanaǵa jetkizildi. Atalǵan derek QR Qylmystyq kodeksiniń 119-baby 1-bóligine sáıkes sotqa deıingi tergep-tekserýdiń biryńǵaı tizilimine tirkelip, tergeý amaldary júrgizilýde», dep habarlady vedomstvodan.

BQO densaýlyq saqtaý basqarmasynyń baspasóz qyzmeti sábıdiń densaýlyǵyna qatysty málimetti keıin beretinin jetkizdi.