Oralda «Kók týdyń jelbiregeni» atty patrıottyq kontsert qoıyldy

ORAL. QazAqparat - Oral qalasynda QR memlekettik rámizderiniń 25 jyldyq merekesine oraı «Kók týdyń jelbiregeni» atty jańa joba aıasynda patrıottyq ánderdi oryndaıtyn belgili ánshi, «Daryn» memlekettik jastar syılyǵynyń ıegeri Ibragım Eskendirdiń jeke shyǵarmashylyq keshi ótti, dep habarlaıdy «QazAqparat» tilshisi.

«Jas Otan» jastar qanaty «Baldáýren» respýblıkalyq oqý-saýyqtyrý ortalyǵymen birge Elbasy N.Á.Nazarbaevtyń «Bolashaqqa baǵdar: rýhanı jańǵyrý» atty maqalasyndaǵy «Jańa turpatty jańǵyrýdyń eń basty sharty - ulttyq kodyńdy saqtaı bilý» degen sózin negizge ala otyryp, óskeleń urpaqty otanshyldyqqa tárbıeleý, jastardyń boıynda patrıottyq sezimdi nyǵaıtý maqsatynda atalmysh jobany qolǵa alǵan bolatyn.


Kontsert barysynda arnaıy mektep-ınternattyń ónerpazdary, oblystyq otbasylyq úlgidegi balalar aýylynyń tárbıelenýshileri de sahnaǵa shyqty. Sonymen qatar Ibragım Eskendir elge tanymal jaıdarmanshy Qabdol Tilekov, «Mereıli otbasy - 2016» ulttyq baıqaýyna qatysqan «Bıǵalıevter» otbasylyq ansambliniń múshesi Marına Bıǵalıeva, sambo kúresinen halyqaralyq jarystarda júlde alyp júrgen Serikbaı Nyǵmet syndy daryndy jastardyń «Jas Otan» jastar qanatynyń qataryna qabyldanǵany jóninde jarııa etip, tósbelgilerin tapsyrdy.
Oǵan qosa mektep oqýshylary men «Baldáýren» respýblıkalyq oqý-saýyqtyrý ortalyǵy bazasynda qurylǵan qazaqstandyq jas patrıottar akademııasynyń músheleri Elbasyna arnaǵan óz lebizderin «Tilek kitapshasyna» jazý múmkindigine ıe boldy. Atalmysh kitap aımaqtan aımaqqa joldanyp, Astana qalasynda ótetin merekelik keshterdiń birinde memleket basshysyna tabystalmaqshy.



Aıta keteıik, osylaısha ár óńirde patrıottyq ánderdi oryndap, óz ónerin kórsetip júrgen Ibragım Eskendir jyl sońynda elordada qorytyndy kontsertin qoımaqshy.