Oralda qoǵamdyq kólik qatary jańa avtobýstarmen tolyqty

ORAL. QazAqparat – Oral qalasynda qoǵamdyq kólik qatary jańa avtobýstarmen tolyqtyryldy, dep habarlaıdy QazAqparat tilshisi.

Oral qalasy ákimdiginen málim etkendeı, «Batys Dılıjans» jolaýshylardy tasymaldaý kompanııasy «Vektor Next» markaly jańa 7 avtobýsty satyp aldy.

Jolaýshylardy tasymaldaıtyn jańa qoǵamdyq kólikte avtobýstardyń júrý baǵytyn bilýge arnalǵan GPS qurylǵysy ornatylady.

Sondaı-aq múmkindigi shekteýli jandardyń arbasyna arnalǵan pandýs, elektrondy tablo jáne beınekameramen jasaqtalǵan.

Oral qalasynyń ákimi Mırjan Satqanov turǵyndardy qýanyshty oqıǵamen quttyqtap, jańa avtobýs kiltterin júrgizýshilerge tabys etti.

Aıta keteıik, sońǵy eki jylda tasymaldaýshy mekemeler «Ónerkásipti damytý qory» AQ arqyly 3,2 mlrd teńgege 79 jańa avtobýs satyp aldy. Avtobýstardy satyp alý esebinen jyljymaly quramnyń tozýy 32 paıyzǵa deıin qysqardy. Bul jumystardyń bári áleýmettik mańyzy bar tasymaldaýdy júzege asyrýǵa baılanysty tasymaldaýshylardyń shyǵyndaryn sýbsıdııalaý arqyly júzege asyp otyr. Ótken jyly osy baǵytta qalalyq kásiporyndarǵa 3,9 mlrd teńge kóleminde sýbsıdııa berilgen edi. 2023 jyly 5,2 mlrd teńge bólinedi dep josparlanýda.

Jalpy, bıyl qalalyq tasymaldaýshy kompanııalar 40 jańa avtobýs satyp alýdy kózdep otyr.