Oralda qyzdy urǵan er adamǵa qatysty qylmystyq is qozǵaldy
ORAL. KAZINFORM — Oral qalasynda er adamnyń qyzdy uryp-soǵyp jatqany túsirilgen beınejazba áleýmettik jelide taraldy.
Ondaǵy aqparatqa qaraǵanda, oqıǵa Oraldaǵy klýbtardyń birinde bolǵan. Beınejazbada er adamnyń qyzdy urǵany, sodan keıin betine ydysty laqtyrǵany kórinedi.
Osyǵan baılanysty Kazinform tilshisi BQO polıtsııa departamentiniń baspasóz qyzmetine habarlasqan edi.
Departamenttiń baspasóz qyzmetinen túsken málimetke qaraǵanda, atalǵan derek boıynsha QR QK 109-babyna (uryp-soǵý) sáıkes qylmystyq is qozǵalǵan.
— Beınejazbada kórsetilgen er adam ustalyp, polıtsııa bólimine jetkizildi. Qazirgi ýaqytta tergeý jumystary jalǵasýda. Tergeý barysy Batys Qazaqstan oblysy polıtsııa departamenti basshylyǵynyń baqylaýynda. QR Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy, — delingen resmı jaýapta.
Eske sala keteıik, budan buryn Oralda toıdaǵy janjalǵa baılanysty qylmystyq is qozǵalǵanyn jazǵan edik.
