Oralda kisi óltirýge oqtaldy degen kúdikpen polıtsııa qyzmetkeri qamaýǵa alyndy
ORAL. QazAqparat – Oralda kisi óltirýge oqtaldy degen kúdikpen polıtsııa qyzmetkeri qamaýǵa alyndy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, atalǵan azamat QR Qylmystyq ister júrgizý kodeksi 128-babyna sáıkes ýaqytsha oqshaýlaý ızolıatoryna jatqyzyldy.
Budan buryn habarlaǵanymyzdaı, Oralda túngi klýbta aýyr jaraqat alǵan 27 jastaǵy jigittiń aýrýhanaǵa túsip, bul oqıǵaǵa polıtsııa qyzmetkeriniń qatysy bar-joǵy tekserilgen bolatyn.
Aldymen bul oqıǵa boıynsha QR QK 107-baby 1-bóligine sáıkes (densaýlyqqa qasaqana aýyrlyǵy ortasha zııan keltirý) qylmystyq is qozǵalǵan edi.
Qazirgi kezde bul is QR QK 24-baby 3-bóligi – 99-baby 1-bóligine sáıkes (adam óltirýge oqtalý) qaıta dárejelendi. Osyǵan oraı tergeý amaldary júrgizilip, istiń mán-jaıy anyqtalý ústinde.
