Oralda kisi óltirgen turǵyn 10 jylǵa sottaldy
ORAL. QazAqparat - Oral qalalyq sotynda 31 naýryz kúni QR QK 293-baby 2-bólimi 1-tarmaǵy, 106-baby 3-bólimimen aıyptalǵan B.Baıbolovqa jáne QR QK 293-baby 2-bólimi 1-tarmaǵyna sáıkes N.Rysqalıev, A.Jákıevke qatysty úkim shyǵaryldy, dep habarlaıdy «QazAqparat» HAA tilshisi.
Oral qalalyq sotynan túsken málimetke qaraǵanda, 2016 jyly 13 qarasha kúni «Kaktýs» dısko-barynyń qasynda B.Baıbolov, A.Jákıev, N.Rysqalıev mas kúıinde N.Kozonogın, A.Kolesnıkov, S.Bocharovqa sebepsiz baılanyp, balaǵattaǵan. Sosyn úsheýine soqqy jasaı bastaǵan. Osy kezde B.Baıbolov S.Bocharovtyń basynan aıaǵymen tepken, sodan keıin oqıǵa ornynan boı tasalaǵan. Alǵan dene jaraqaty saldarynan S.Bocharov sol jerde kóz jumsa, N.Kozonogın men A.Kolesnıkov oblystyq aýrýhananyń jaraqat bólimine jetkizilgen.
Sot úkimimen B.Baıbolov QR QK 293-baby 2-bólimi 1-tarmaǵy, 106-baby 3-bólimine sáıkes aıypty dep tanylyp, QR QK 58-baby 3-bólimi qoldanyla otyryp, 10 jylǵa bas bostandyǵynan aıyrý jazasyn jalpy tártiptegi túzetý kolonııasynda óteýge sottaldy.
N.Rysqalıev pen A.Jákıev QR QK 293-baby 2-bólimi 1-tarmaǵyna sáıkes aıypty dep tanylyp, olardyń 2 jyl merzimge bas bostandyqtary shekteldi. «Qazaqstan Respýblıkasy táýelsizdiginiń 25 jyldyǵyna baılanysty raqymshylyq jasaý týraly» QR Zańy 2-baby 3-tarmaǵy 1-tarmaqshasyna sáıkes ekeýi de jazadan bosatylyp, qamaýda ustaý bultartpaý sharasynyń kúshi joıyldy.
Sot úkimi zańdy kúshine engen joq.
