Oralda kisi óltirgen qanypezer 17 jylǵa sottaldy
ORAL. QazAqparat - BQO qylmystyq ister jónindegi mamandandyrylǵan aýdanaralyq soty QR QK 24-baby 3-bóligi - 188-baby 2-bóligi 3-tarmaǵy, 99-baby 2-bóligi 10-tarmaǵy, 378-baby 1-bóligimen aıyptalǵan A.Dıatlovqa qatysty qylmystyq iske núkte qoıdy, dep habarlaıdy «QazAqparat» tilshisi.
BQO sotynyń baspasóz qyzmetinen túsken málimetke qaraǵanda, sot talqysynda belgili bolǵanyndaı, A.Dıatlov bóten múlikti urlaý maqsatymen jábirlenýshiniń úıine zańsyz kirgen. Sol sátte úı ıesimen kezigip qalyp, qylmysyn jasyrý nıetimen oǵan kóptegen pyshaq soqqylaryn jasaǵan. Sonyń saldarynan marqum oqıǵa ornynda kóz jumdy.
Sol kúni-aq ustalǵan A.Dıatlov polıtsııa bólimine jetkizilgen. Sol jerde polıtsııa qyzmetkerin balaǵattap, bılik ókiline til tıgizgen.
Sot A.Dıatlovty QR QK 24-baby 3-bóligi - 188-baby 2-bóligi 3-tarmaǵy, 99-baby 2-bóligi 10-tarmaǵy, 378-baby 1-bóligine sáıkes aıypty dep taýyp, QR QK 58-baby 4-bóligi negizinde 60-bap 1-bóligi boıynsha jazany ishinara sińirý jáne burynǵy sot úkimine baılanysty ótelmegen jaza merzimin qosý jolymen túpkilikti 17 jyl 1 aıǵa bas bostandyǵynan aıyrý jazasyn belgiledi. Oǵan qosa zańsyz jolmen tapqan múlki tárkilenip, jazasyn qaýipsizdik sharalary barynsha kúsheıtilgen qylmystyq-atqarý júıesi mekemesinde óteıdi. Sondaı-aq maskúnemdikten májbúrli túrde emdeledi.
