Oralda kıkboksıngten el chempıonatynyń jeńimpazdary anyqtaldy
ORAL. QazAqparat - Oral qalasynda kıkboksıngten 1999-2000 jylǵy jastar arasynda el chempıonatynyń jeńimpaz-júldegerleri belgili boldy, dep habarlaıdy «QazAqparat» tilshisi.
Kıkboksıngten BQO quramasynyń aǵa jattyqtyrýshysy, osy sport túrinen oblystyq federatsııa prezıdenti Andreı Smırnovtyń aıtýynsha, birinshilikke barlyǵy 157 sportshy qatysyp, baq synady.
Salmaq dárejeleri (K-1) boıynsha myna kıkboksıng sheberleri jeńimpaz atandy: Beıbarys Saýhanbek (51 kg, Taraz), Akbar Almatov (54 kg, ShQO), Nurjan Saparáli (57 kg, OQO), Danııar Omar (60 kg, Qyzylorda), Dáýren Ajymov (63,5 kg, Aqtóbe), Meıirhan Aıtbaev (67 kg, OQO), Asylhan Tólembaı (71 kg, Aqtóbe), Rýslan Stepanov (75 kg, Qaraǵandy), Baǵdat Saǵyndyq (81 kg) jáne Nıkıta Sýhodol (+91 kg, Aqtóbe). Qyzdar arasynda (fýll-kontakt) Aıman Qarshyǵa (48 kg, Taraz), Dıana Júsipova (52 kg), Saıana Shımırova (56 kg, ekeýi de Astanadan) jeńis tuǵyryna kóterildi.
Batysqazaqstandyqtar arasynan Arnur Nurbolatov +91 kg salmaqta ekinshi, al Erjan Rahymǵalıev (67 kg) úshinshi orynǵa ıe boldy.
A.Smırnovtyń sózine qaraǵanda, Oralda el chempıonaty osymen ekinshi ret uıymdastyrylyp otyr. Budan buryn 2006 jyly ótkizilgen bolatyn. Kıkboksıng el óńirlerinde barynsha damyp keledi. Oraldyń ózinde úsh klýb jumys jasasa, olarda túrli jastaǵy 150-deı adam jattyǵady. Bıyl Qaztalov aýdanynda taǵy bir klýb (bapkeri Muhanbet Qurmanálıev) ashyldy.
