Oralda kıberalaıaqtar turǵynnyń 5 mıllıon teńgesin jymqyrdy
ASTANA. KAZINFORM – Oral qalasynda kıberalaıaqtar turǵynnyń 5 mıllıon teńgesin ıemdendi.
Polisia.kz-tiń habarlaýynsha, qala turǵynyna belgisiz adamdar qońyraý shalyp, SMS arqyly kelgen kodty aıtýyn suraǵan. Keıin olar ózin bank qyzmetkerleri men Qazaqstan Respýblıkasy qarjylyq monıtorıng agenttiginiń mamandary retinde tanystyryp, áıeldiń atyna nesıe rásimdelip jatqanyn habarlaǵan. Qarajatty qorǵaý maqsatynda arnaıy qosymshany shuǵyl ornatý qajettigin aıtqan. WhatsApp messendjeri arqyly jalǵan baǵdarlama jiberilip, ol arqyly alaıaqtar jábirlenýshiniń telefonyna qashyqtan qol jetkizgen. Osylaısha, olar 5 mıllıon teńge kóleminde nesıe rásimdep, qarajatty óz maqsattaryna jumsaǵan.
Polıtsııa azamattarǵa belgisiz siltemeler arqyly qosymsha ornatpaýǵa, resmı bank qosymshalaryn tek App Store nemese Google Play dúkenderinen júkteýge keńes beredi. Sonymen qatar memlekettik organdar messendjerler arqyly ornatýǵa arnalǵan faıldar jibermeıtinin eskertedi. Mundaı qońyraýlar túsken jaǵdaıda sóılesýdi toqtatý qajet.
Qazirgi ýaqytta atalǵan oqıǵa boıynsha tergeý jumystary júrgizilip jatyr.
Eske salsaq, budan buryn áleýmettik jeli arqyly 7,7 mln teńge ıemdengen alaıaq 6 jylǵa sottalǵanyn jazǵan edik.