Oralda keıýana men onyń múgedek ulyn óltirgen kúdiktiler ustaldy
ORAL. QazAqparat – Oralda keıýana men onyń múgedek ulyn óltirgen kúdiktiler ustaldy, dep habarlaıdy QazAqparat tilshisi.
BQO polıtsııa departamenti bastyǵynyń orynbasary Ashat Temirjanovtyń málim etkenindeı, qandy oqıǵa ótken jyly 7 qyrkúıekte oryn aldy.
Tsıolkovskıı kóshesi 53-úıden zorlyqpen óltirilgen 1934 jylǵy zeınetker keıýana men onyń uly, 2 top múgedegi, DTsP sal aýrýymen aýyrǵan 1959 jylǵy er adamnyń denesi tabylǵan bolatyn.
Oqıǵa ornynan 130 myń teńge men 75 myń teńgeniń altyn buıymdary urlanǵany belgili boldy.
Sot-medıtsınalyq saraptamaǵa sáıkes marqumdar tunshyqtyrylǵan ári jabyq bas-mı jaraqattaryn alǵan.
Keshendi tergeý sharalary barysynda 1992 jylǵy T., 1993 jylǵy Z. jáne 1991 jylǵy K. esimdi kúdiktiler anyqtaldy.
Ustalǵandardyń biri kinásin moıyndap, tergeý oryndaryna kómektesýge kelisti. Ol urlanǵan zattyń qaıda turǵandyǵyn kórsetti.
Qalǵan eki kúdiktiniń de kinási tolyqtaı dáleldendi. Mysaly, urlanǵan altyn buıymnyń molekýlıarlyq-genetıkalyq saraptamaǵa sáıkes marqum áıelge tıesili ekendigi anyqtaldy. Sondaı-aq kúdiktilerdiń biriniń kıiminde zeınetkerdiń DNK-sy tabyldy.
«Kúdiktilerge qatysty sot-psıhıatrııalyq saraptamasynyń qorytyndysy shyqqannan keıin isti sotqa jiberý týraly protsessýaldyq sheshim qabyldanatyn bolady», dedi A.Temirjanov.
Oral qalasy polıtsııa basqarmasy bastyǵynyń orynbasary Nurlan Bısenovtiń aıtýynsha, osy oqıǵaǵa baılanysty kóptegen jumystar júrgizildi. Sonyń ishinde jedel izdestirý sharalary barysynda basqa 63 qylmys ashylǵan. Budan basqa krımınaldyq polıtsııa qyzmetkerleri izdeýde júrgen 11 adamdy (sonyń 9-y qylmystyq quqyqbuzýshylyq jasaǵan) ustap, joǵalyp ketken 2 adamdy tapty.
Eske sala keteıik, budan buryn Oralda jeke úıden eki adamnyń múrdesi tabylǵanyn jazǵan bolatynbyz.
