Oralda keıbir jol kompanııalary jumys kestesinen keshigip otyr

Bul týraly BQO ákimi Altaı Kólginov qala kúni qarsańynda shahar basshysy jáne onyń orynbasarlarymen ótkizgen jıynda málim boldy, dep habarlaıdy «QazAqparat» tilshisi.

Osyǵan baılanysty óńir basshysy qala ákimi Murat Muqaevqa eskertý jasap, ásirese, bilim berý nysandary mańyndaǵy qurylystardy 1 qyrkúıekke deıin retteýdi tapsyrdy. Mundaı kesheýildeýdiń aldymen durys josparlamaýdan týyndaıtyny belgili. Sondyqtan oblys ákimi kelesi jyldyń qurylystaryn josparlaýdy qazirden bastaý kerektigin atap ótti.

Aıta keteıik, bıyl oblys ortalyǵynda jalpy uzyndyǵy 72 shaqyrym bolatyn 67 kóshege asfalt tóselýde. Jol qurylysyna 8,1 mlrd. teńge qaralǵan bolatyn.

Oblys ákimi jolaýshylar tasymalyna jaýapty kásiporyndardyń jumysyn qadaǵalaý kerektigin de eskertti. «Avtobýstardy jańartýdan bastap kondýktor men júrgizýshiniń arnaıy kıim kııýi, jolaýshylarmen qarym-qatynasyna deıin  bári retke keltirilýi tıis», dedi Altaı Kólginov.

Osy aıtylǵandardan nátıje shyǵarýǵa ýáde bergen qala ákimi Murat Muqaev oblys ortalyǵynda atqarylyp jatqan jumystar jóninde baıandap berdi. Mysaly, qalanyń kórkin arttyryp, turǵyndarǵa qolaıly jaǵdaı týǵyzý maqsatynda bıyl qyryqtan astam nysan jóndelip, salynýda. 20 aýla aýmaǵy abattandyrylyp, 17 sport alańy boı kóterýde. Sonymen qatar birneshe tynymbaq qalpyna keltirilýde.

Oblys ákimi qala basshylyǵyna shahardaǵy qurylys, abattandyrýdan bólek zamanaýı jobalardy da odan ári damytýdy tapsyrdy. ««Smart sıtı» aıasyndaǵy «2GIS», «Qaýipsiz qala», beınekameralarmen jabdyqtaý máseleleri nazardan tys qalmaýy kerek», - dedi A. Kólginov.