Oralda kelinin óltirdi degen kúdikti qamaýǵa alyndy
ORAL. QazAqparat - Oralda kelinin óltirdi degen kúdikpen er adam qamaýǵa alyndy, dep habarlaıdy QazAqparat tilshisi.
Oral qalalyq sotynan túsken málimetke qaraǵanda, burynǵy kelinin óltirdi degen kúdikpen azamat A.-ny eki aıǵa qamaýǵa alý týraly bultartpaý sharasy sanktsııalandy.
Qandy oqıǵa Oralda 8 sáýir, jeksenbi kúni bolǵan.
Aqerkeniń naǵashy aǵasy Erjan Sarqytbekovtyń aıtýynsha, 1990 jylǵy jıen qaryndasy burynǵy kúıeýi Saıattan eki jasar balasyn alyp qaıtý úshin Semeıden Oral qalasyna kelgen.
Aqerke Semeıde anasymen turǵan. Oraldyq Saıatpen tanysyp, 2015 jyly turmysqa shyqqan. Bir jyldan keıin uly dúnıege kelgen. Áýeli Oralda, keıin Aqsaı qalasynda turǵan.
E.Sarqytbekovtyń sózine qaraǵanda, kúıeýi habarsyz ketkennen keıin Aqerke Oralda turatyn ata-enesine barǵanda, olar balany bermeıtinin aıtqan. Degenmen Aqerke balasyn ózimen birge Semeıge alyp ketken. Budan keıin Saıat Semeıge kelip, Aqerkeni aldap, ulyn urlap áketken.
«Qaryndasymnyń saý-tamtyǵy qalmaǵan. Tepkileı bergen, sodan keıin pyshaqtaǵan. Qaıynatasy men óltirdim dep moıyndaǵanymen, muny ekeýinen birdeı kórip otyrmyz. Aqsaı qalasynda turǵan kezinde de Saıat Aqerkeni uryp-soqqan. Sodan jaraqat alǵan ol aýrýhanaǵa da jatyp shyqqan. Muny birge jumys jasaǵan adamdar da aıtyp otyr. Alaıda qaryndasym uıalyp, bul jóninde bizge tis jarmaǵan. Biz tergeýdiń ádil júrgizilgenin qalaımyz», - dedi «QazAqparat» tilshisine E.Sarqytbekov.
Aqerkeniń súıegin aǵalary kelip, alyp ketken. Marqum erteń Semeı qalasynda jer qoınyna beriledi.
Eske sala keteıik, budan buryn Oralda «Sheber» bazary janyndaǵy konteınerden er adamnyń múrdesi tabylyp, sondaı-aq jeksenbi kúni áıeldi óltirý deregi tirkelgenin jazǵan bolatynbyz.
Qazirgi kezde qos qandy oqıǵa boıynsha da kúdiktiler eki aıǵa qamaýǵa alynyp, tergeý amaldary jalǵasýda.
