Oralda «Qazirgi zaman qaharmandaryna» qurmet kórsetildi
Sharada elimiz óńirlerinen kelgen, adamdardy qutqarý kezinde erlik kórsetken tártip saqshylaryna qurmet kórsetildi.
«Qazirgi zaman qaharmandary» sahna tórine qurmetpen shaqyrylyp, olardyń erlik isteri jarııa etildi. Árqaısysyna QR Іshki ister mınıstri, polıtsııa general-polkovnıgi Qalmuhanbet Qasymovtyń alǵyshattary men arnaıy músinsheler tabys etildi.
QR ІІM Kadr jumysy departamentiniń basqarma bastyǵy, polıtsııa polkovnıgi Murat Jaqypbekovtiń aıtýynsha, atalmysh shara birinshi ret 2003 jyly Halyq qaharmany, polıtsııa kapıtany Ǵazız Baıtasovtyń erligin qurmetteý maqsatynda týǵan jeri Jambyl oblysynda ótkizildi.
Memleket basshysynyń «Rýhanı jańǵyrý: bolashaqqa baǵdar» baǵdarlamalyq maqalasy aıasynda beıbit kúnde erlik jasaǵan tártip saqshylarynyń batyrlyǵyn keńinen pash etý úshin jyl saıynǵy shara ótken jyly Atyraý oblysynda uıymdastyrylsa, bıyl Batys Qazaqstanda jalǵasyn tapty. Birneshe kúnge sozylǵan shara barysynda «Qazirgi zaman qaharmandary» óńir aýdandarynda da boldy.
«Elbasymyz bıylǵy 5 qazandaǵy Joldaýynda ishki ister organdary qyzmetkerleriniń qylmyspen kúreste aldyńǵy shepte júretinin, kóbine óz basyn qaterge tigip, azamattardy qorǵaıtynyn atap kórsetken bolatyn. Sonyń jarqyn mysalyn «Qazirgi zaman qaharmandarynyń» ómirinen anyq kórýge bolady. Memleket basshysy atalmysh Joldaýynda polıtsııa jumysyn túbegeıli jaqsartý baǵytynda tapsyrmalar bergeni málim. Osyǵan oraı «Іshki ister organdaryn jańǵyrtý jónindegi jol kartasy» jasalyp, tıisti jumystar jasalatyn bolady. Tártip saqshylary sol bıik maqsat-mindet údesinen shyǵý úshin aldaǵy ýaqytta da tynbaı eńbek ete beredi», - dedi M.Jaqypbekov.
Onyń sózine qaraǵanda, elimiz táýelsizdik alǵannan beri qyzmet babynda 780 polıtsııa qyzmetkeri erlikpen qaza tapsa, sonyń jeteýi Batys Qazaqstan oblysynan. Olardyń esimderin de umytpaı, qasterleý, keıingi urpaqqa úlgi etý - ortaq paryz.
