Oralda Qazaqstan-Reseı kásipkerleri óńiraralyq yntymaqtastyqty damytý joldaryn talqylady
ORAL. KAZINFORM — Qazaqstan-Reseı XXI óńiraralyq yntymaqtastyq forýmy qarsańynda «Atameken» óner ordasynda «Jumysshy mamandyqtaryn ındýstrııalandyrý men ımport almasýǵa kilt esebinde damytý» taqyrybynda eki eldiń iskerlik keńesiniń H otyrysy boldy.
Otyrysty ashqan BQO kásipkerler palatasynyń dırektory Murat Jákibaevtyń málim etkenindeı, Batys Qazaqstan oblysynyń Reseıdiń bes óńirimen shektesetini belgili.
Onyń sózine qaraǵanda, oblystyń Reseı Federatsııasynyń iri ónerkásip jáne kólik ortalyqtaryna jaqyn bolýy saýda, logıstıka, ónerkásip kooperatsııasy men birlesken ınvestıtsııalardy damytýǵa septesedi.
— Kóptegen jyl boıy BQO eki eldiń ekonomıkalyq múddelerin biriktirip, shekaralas aýmaqtardyń turaqty damýyn qamtamasyz etetin mańyzdy kópir bolyp qalyp otyr. Batys Qazaqstan oblysynyń Reseı Federatsııasymen syrtqy saýda aınalymy 2025 jyldyń qańtar-tamyzynda 504,4 mln AQSh dollaryna jetti, bul ótken jylǵy osy kezeńdegiden (459,1 mln dollar) 9,8 paıyzǵa artyq, — dedi M.Jákibaev.
Qazaqstan-Reseı iskerlik keńesi Qazaqstan bólimi teń tóraǵasynyń orynbasary Barzonı Nabıev atalǵan uıymnyń osy jyldar ishinde eki el bıznesiniń senimdi ınstıtýtyna jáne tıimdi tájirıbe almasý alańyna aınalǵanyn atap ótti.
— Qazirgi tańda ındýstrııalandyrýǵa, óndiristi tehnologııalyq jańartý jáne ımport almasýǵa baılanysty jobalarǵa erekshe mán berilip otyr. Munyń bel ortasynda eńbek adamy — bilikti maman, óz isiniń sheberi tur. Jumysshy mamandyqtary — kez kelgen óndiristik júıeniń irgetasy, turaqty ekonomıkalyq ósimniń negizi. Bilikti mamandarsyz, tipti, eń ozyq ınjenerlik ıdeıalardy júzege asyrý múmkin emes. Turǵyzylatyn qurylymdar men óndiriletin ónerkásip ónimderiniń sapasy, senimdiligi jáne uzaq merzimge tózimdiligi osy sheberlikke, tártip pen jaýapkershilikke baılanysty, — dedi B.Nabıev.
Onyń aıtýynsha, qazaqstandyq kompanııalar reseılik kásiporyndarmen kóp jyldan beri jemisti baılanys jasap, birqatar mańyzdy ınfraqurylymdyq jobalardy júzege asyrdy.
Qazaqstan sondaı-aq bilikti jumysshy kadrlardy daıarlaý máselesin júıeli sheship keledi. Sońǵy jyldary elde teorııalyq oqý men óndiristegi mashyqty ushtastyratyn dýaldy bilim berý modeli belsendi damýda. Іri kásiporyndar janynan biliktilik salalyq ortalyqtary men oqý-óndiristik polıgondary qurylyp, kadrlar biliktiligin arttyrý men qaıta daıarlaý baǵytynda memlekettik baǵdarlamalar júzege asyrylyp jatyr.
Qazaqstan-Reseı iskerlik keńesi Reseı bólimi teń tóraǵasynyń orynbasary Natalıa Krıýchkova óńiraralyq forýmda ózekti máselelerdiń talqylanyp kele jatqanyna toqtaldy.
— Bıyl Qazaqstanda jumysshy mamandyqtarynyń jyly dep jarııalandy. Reseı úshin de bul — ekonomıka men ónerkásiptegi yntymaqtastyqtyń negizi. Jahandyq ekonomıka jaǵdaıynda ónerkásip turaqty damýdyń negizi sanalady. Ótken jyl men bıylǵy alty aıdyń kórsetkishterin alǵanda, eki elde turaqty ósý baıqalady. Eki jaqty qarym-qatynas ta nyǵaıyp keledi. 2025 jylǵy qyrkúıektegi málimet boıynsha Qazaqstanda 23 myńnan astam birlesken kásiporyn tirkelgen, — dedi N.Krıýchkova.
Keńes otyrysynda sondaı-aq «Korporatsııa «MSP» AQ bas dırektorynyń orynbasary Nıkıta Bantsekın, «Kýbleı» JShS dırektory Záýre Berekesheva jáne basqa kásiporyndar basshylary men eki eldiń oqý oryndarynyń ókilderi óz oılaryn ortaǵa salyp, tájirıbelerimen bólisti.
Eki kúnge sozylatyn Qazaqstan-Reseı XXI óńiraralyq forýmy aıasynda ózge de josparlanǵan is-sharalar ótip jatyr.
Eske sala keteıik, budan buryn Qasym-Jomart Toqaevtyń Qazaqstan-Reseı qarym-qatynasy jan-jaqty strategııalyq áriptestik pen odaqtastyq deńgeıine kóship jatqany týraly aıtqanyn jazǵan edik.