Oralda Qazaqstan polıtsııasynyń 25 jyldyǵyna oraı úzdik jarııalanym ıeleri marapattaldy
ORAL. QazAqparat - Búgin Baılanys jáne aqparat qyzmetkerleriniń kúnine oraı BQO ishki ister departamentinde saltanatty shara boldy, dep habarlaıdy «QazAqparat» tilshisi.
Departament bastyǵy, polıtsııa general-maıory Maqsuthan Ablazımov jýrnalısterdi tól merekelerimen quttyqtap, quqyqbuzýshylyq pen qylmystyń aldyn alý, turǵyndar qaýipsizdigin qamtamasyz etýdegi tártip saqshylarynyń jumysyn jarııa etýdegi eńbekterin atap kórsetti. Departamenttiń aldaǵy ýaqytta da buqaralyq aqparat quraldarynyń túrli saýaldaryna ýaqytyly jaýap berip, birlese qyzmet jasaı beretinin jetkizdi. 
Shara barysynda BAQ ókilderine túrli marapattar tapsyryldy. Sonyń ishinde «Qazaqstan - Oral» telearnasy, «Jaıyq Press» JShS jáne oblystyq «Prıýrale» gazeti redaktsııasynyń basshylary Aslanbek Ǵubashev, Jantas Safýllın, Roza Syıqovaǵa «Qazaqstan polıtsııasyna 25 jyl» tósbelgisi tabys etildi. Oǵan qosa Qazaqstan polıtsııasynyń 25 jyldyǵyna arnalǵan baıqaý qorytyndylary da jarııa etildi. «Qazaqstan - Oral» telearnasy, «QazAqparat» HAA jáne «Prıýrale» gazetteriniń tilshileri Dalıa Nasıpova, Ǵaısaǵalı Seıtaq, Saıda Tólegenova úzdik jarııalanym ıeleri atandy. 
Búgin sondaı-aq oblystyq sotta da osyndaı jıyn ótti. Onda BQO soty azamattyq ister jónindegi sot alqasynyń tóraǵasy Qaırat Adranov jýrnalısterdi merekemen quttyqtap, sot salasynda júrgizilip jatqan reformalardan habardar ete kelip, BAQ ókilderimen ashyq ta jarııa túrde jumys jasaýǵa daıyn ekendikterin bildirdi. Sot jumysyn úzbeı nasıhattap kele jatqan basylymdar men elektrondy aqparat quraldary, jekelegen jýrnalıster alǵyshattarmen marapattaldy.
