Oralda «Qazaqstan barysy» týrnıriniń oblystyq kezeńi márege jetti
ORAL. QazAqparat - Qadyr Myrza Álı atyndaǵy mádenıet jáne óner ortalyǵynyń amfıteatrynda qazaq kúresinen Elbasy Nursultan Nazarbaevtyń júldesi úshin dástúrli «Qazaqstan barysy» týrnıriniń oblystyq kezeńi márege jetti, dep habarlaıdy «QazAqparat» tilshisi.
Oǵan oblys aýdandarynan jeńimpaz atanyp kelgen 12 jáne Oral qalasynan eki, barlyǵy 14 palýan qatysyp, baq synady.
Jarystyń ashylý rásiminde oblys ákiminiń birinshi orynbasary Arman Óteǵulov palýandarǵa tabys tilep, bıyl jetinshi ret uıymdastyrylyp otyrǵan «Qazaqstan barysy» týrnıriniń respýblıkalyq saıysy halyqaralyq «EKSPO-2017» kórmesi aıasynda ótkiziletinin, sondyqtan oǵan joldama alý úlken abyroı ekendigin jetkizdi.
Tartysty ótken týrnır qorytyndysynda Jánibek aýdanynyń namysyn qorǵaǵan Ernazar Hamzın (salmaǵy 90 kg) myqtylyǵyn tanytyp, jeńimpaz atandy. Ol ekinshi orynǵa kóterilgen bórlilik Temirlan Kólbaımen (100 kg) birge elordada ótetin respýblıkalyq jarysta Batys Qazaqstan oblysynyń namysyn qorǵaıtyn bolady. Úzdik úshtikti syrymdyq Nurymjan Ǵabbasov (90 kg) túıindedi.
