Oralda «KAZAKH INVEST» UK» óńirlik ókildigi qurylyp, jumys jasaı bastady
ORAL. QazAqparat - Oral qalasynda «KAZAKH INVEST» ulttyq kompanııasy» AQ-nyń óńirlik ókildigi qurylyp, jumys jasaı bastady. Bul týraly BQO ákimdiginde oblys ákimi Altaı Kólginovtiń tóraǵalyq etýimen jáne «KAZAKH INVEST» ulttyq kompanııasy» AQ basqarma tóraǵasynyń orynbasary Birjan Qaneshevtiń qatysýymen ótken jıynda málim etildi, dep habarlaıdy «QazAqparat» tilshisi.
Bıylǵy naýryzda Elbasy tapsyrmasyna sáıkes Qazaqstan ekonomıkasyna tikeleı ınvestıtsııa tartý baǵytynda «KAZAKH INVEST» ulttyq kompanııasy» AQ qurylǵany belgili. Atalmysh kompanııa shet elde óz ókildikteri bar, elimizge ınvestıtsııa tartý salasyndaǵy ýákiletti organ bolyp tabylady. Ol ulttyq operator retinde ınvestıtsııalyq jobalardyń bolashaǵy men júzege asyrý joldaryn talqylaǵan kezde Úkimet múddesin qorǵaıdy.
Birjan Qaneshevtiń aıtýynsha, ınvestıtsııany elde ustap qalý - Elbasynyń basty tapsyrmasy. Qazir álemde 2 trln. dollar aınalymda júrse, ony elimizge tartý úshin qolaıly jaǵdaı jasaý qajet. Bul rette básekelestik te joǵary. Oǵan «KAZAKH INVEST» sekildi 500-deı kompanııa qatysady. Halyqaralyq statıstıkaǵa qaraǵanda, jańa ınvestordy tartý úsh esege qymbat túsedi. Sondyqtan burynnan bar ınvestorlarmen jumys jasap, jobalardy keńeıtip, jańa baǵyttaryn izdestirý mańyzdy. 
Aımaqtarda ınvestıtsııa tartý jumysyn óristetý maqsatynda «KAZAKH INVEST» kompanııasy óńirlerde ókildikterin ashýda. Batys Qazaqstan oblysynda Azamat Bısenov óńirlik dırektor bolyp, Ázerbaı Úmbetálıev onyń orynbasary bolyp bekitildi. A.Bısenov sonymen qatar oblys ákiminiń ınvestıtsııa tartý jónindegi shtattan tys keńesshisi qyzmetin atqarady.
