Oralda Qazaq televızııasynyń 60 jyldyǵy qurmetine shahmattan týrnır ótti
ORAL. QazAqparat - Búgin Oralda Qazaq televızııasynyń 60 jyldyǵyna jáne Oral telestýdııasynyń tuńǵysh basshysy Naýryzǵalı Sydyqovtyń 90 jyldyǵyna arnalǵan shahmattan jarys márege jetti, dep habarlaıdy «QazAqparat» tilshisi.
Týrnırdi uıymdastyrǵan "AQJAIYQ" telearnasynyń basshysy Aslanbek Ǵubashevtiń aıtýynsha, bıyl Qazaq televızııasynyń 60 jyldyǵyna oraı mereıtoılyq sharalar uıymdastyrylýda. Sonyń ishinde Oral telestýdııasynyń negizin qalaǵan Qazaqstannyń eńbek sińirgen mádenıet qyzmetkeri, «Qurmet Belgisi» ordeniniń ıegeri Naýryzǵalı Sydyqovtyń orny erekshe. 1964 jyldan 1988 jyly zeınetke shyqqanǵa deıin Oral teleradıo komıtetiniń tóraǵasy qyzmetin atqarǵan ol kisi, ásirese, shahmat oıynyn jaqsy kórgen eken. Sol jyldary oblystyq «Oral óńiri», «Prıýrale» gazetteriniń redaktsııalary jáne teleradıokomıteti arasynda jarys udaıy ótip turdy. Mine, endi sol dástúr qaıta jańǵyrtylyp otyr.
BAQ qyzmetkerleri arasyndaǵy jarys shveıtsarııalyq júıemen ótti. Týrnır qorytyndysynda "AQJAIYQ" telearnasynyń qyzmetkerleri Birjan Kýhaev pen Marat Aısa bas júlde men ekinshi oryndy jeńip aldy. Úshinshi júlde oblystyq «Oral óńiri» gazeti bas redaktorynyń orynbasary Syrymbek Tuıaqovqa buıyrdy. «Habar» telearnasynyń menshikti tilshisi Erdenbek Ábish jáne «Jaıyq Press» JShS qyzmetkerleri Ǵaısaǵalı Seıtaq pen er adamdarmen oıynda sheberligin tanyta bilgen Danagúl Sharapıevaǵa yntalandyrý syılyqtary tabys etildi. 
«ıÝnıserv» kompanııasynyń (bas dırektory Nurǵazy Sátbaev) demeýshiligimen ótken jarysqa BQO dene shynyqtyrý jáne sport basqarmasy qoldaý kórsetti.
Naýryzǵalı Sydyqovtyń uly, belgili ǵalym, tarıh ǵylymdarynyń doktory, professor Murat Sydyqovtyń sózine qaraǵanda, aldaǵy ýaqytta atalmysh shahmat týrnıri dástúrli túrde ótip turatyn bolady.
Aıta keteıik, "AQJAIYQ" telearnasynyń ǵımaraty N.Sydyqov atyndaǵy kóshede oryn tepken.
