Oralda qazaq kúresinen respýblıkalyq týrnır márege jetti
ORAL. QazAqparat - Qadyr Myrza Álı atyndaǵy mádenıet jáne óner ortalyǵynda qazaq kúresinen «Jaıyqtyń arystary - qazaqtyń barystary» atty respýblıkalyq týrnır márege jetti.
Osymen úshinshi ret uıymdastyrylyp otyrǵan atalmysh jarys qazaq kúresinen Qazaqstannyń 1939 jylǵy tuńǵysh túıe palýany Eńsep Dosqalıev (1905-1944), sambodan 1989 jylǵy álem chempıony, álem kýbogynyń ıegeri (1988), Qazaqstannyń eńbek sińirgen sport sheberi Asqar Shaıhıev (1963-2000) pen onyń bapkeri, Qazaqstannyń eńbek sińirgen jattyqtyrýshysy, sport qaıratkeri Batyr Qýanyshev (1954-2004), qazaq kúresinen BQO-nyń birneshe márte túıe palýany Oralbek Qojageldın (1964-1999) jáne sambo men qazaq kúresinen el chempıony Qaırat Ábdirahmanovty (1969-2004) eske alýǵa arnaldy.
Týrnırdiń bas tóreshisi Artýr Sherǵalıevtiń aıtýynsha, aıtýly básekege Almaty, Atyraý, Qyzylorda, Mańǵystaý, Ońtústik jáne Batys Qazaqstan oblystarynan barlyǵy 32 palýan qatysyp, «ógiz palýan» jáne «túıe palýan» ataný úshin synǵa tústi. Jarys qorytyndysynda Bórli aýdanynan kelgen Oljas Súleımenov «túıe palýan» atansa, qyzylordalyq Nurym Sálimgereev ekinshi, taǵy bir bórlilik Ernazar Hamzın úshinshi oryndy ıelendi. Olarǵa sáıkesinshe 300 myń, 150 myń jáne 100 myń teńge kóleminde aqshalaı syılyqtar tabys etildi. 90 kg salmaqta ońtústikqazaqstandyq Aqylbek Saǵıdýllaev top jaryp, «ógiz palýan» ataǵyna ıe bolsa, qyzylordalyq Jaıdarbaı Esenov ekinshi, Syrym aýdanynyń ókili Aıbol Orazǵalıev úshinshi orynǵa kóterildi. Olarǵa da aqshalaı syılyqtar tapsyryldy.
