Oralda «Qaıyq» federatsııasynyń kýbogyn sarapqa salǵan jarys jeńimpazdary anyqtaldy
ORAL. QazAqparat - Oralda baıdarka men kanoe esýden jasóspirimder arasynda QR «Qaıyq» federatsııasynyń kýbogy úshin jarystyń jeńimpaz-júldegerleri anyqtaldy, dep habarlaıdy QazAqparat tilshisi.
Birneshe kúnge sozylǵan kýbok saıysyna Qazaqstannyń tórt oblysynan seksendeı jas eskekshi qatysyp, baq synady.
Jarys qorytyndysynda 200 metrlik qashyqtyqta baıdarkadan oraldyq Danııl Sokolov márege birinshi jetse, atyraýlyq Vıacheslav Kırılenko men taǵy bir batysqazaqstandyq Borıs Alhov ekinshi-úshinshi oryndardy bólisti. Qyzdardan oraldyqtar, apaly-sińlili Dilnáz ben Dıana Almaǵambetter alǵashqy eki orynǵa ıe bolsa, Almaty oblysynan kelgen Darıa Klıaın qola júldeni qanaǵat tutty.
Kanoedan osy qashyqtyqta Almaty oblysynyń ókilderi Vladımır Volkov pen Vasılıı Dýtov jáne qyzylordalyq Dıas Bahraddın júldegerler qatarynan kórindi. Qyzdardan oraldyq Marııa Brovkova, Almaty oblysynan Olga Ýsova, qyzylordalyq Saıra Oraqbaeva úzdik úshtikke ilikti.
200 metrge baıdarkamen juptasyp jarysýdan atyraýlyqtar Nıkıta Bakırov pen Vıacheslav Kırılenko ozdy. Kanoedan Almaty oblysynan Vladımır Volkov pen Vasılıı Dýtov aldyna jan salmady. Qyzdardan juptyq synda baıdarkadan Dilnáz ben Dıana Almaǵambetter altynnan alqa taqsa, kanoedan oraldyqtar Marııa Brovkova men Ksenııa Perejogına ozdy.
Estafetalyq jarysta baıdarkadan oraldyqtar Borıs Alhov, Danııl Sokolov, Sergeı Bakaldın, Ratmır Ahmedshın, qyzdardan Dilnáz, Dıana Almaǵambetter, Aıaýlym Janbolat, Antonına Kazanına, kanoedan Almaty oblysynan kelgen Vadım Grıbanov, Vladımır Volkov, Vasılıı Dýtov, Andreı Baskakov tórttigi chempıon atandy.
№1 olımpıadalyq rezervtegi mamandandyrylǵan balalar-jasóspirimder sport mektebi dırektorynyń oqý isi jónindegi orynbasary Nurlybek Tuıaqovtyń aıtýynsha, jarystyń basty ereksheligi, munda birinshi-ekinshi oryndy alǵandar sport sheberi atana alady. Batys Qazaqstannan bes birdeı jas eskekshi osy ataqqa qol sozyp otyr. Bul rette Vıtalıı Astafev, Elena Brovkova syndy jattyqtyrýshylardyń eńbegi zor. Sonymen qatar, Antonına Kazanına, Dilnáz ben Dıana Almaǵambetterdiń bıyldan bastap Astana qalasyndaǵy sportta daryndy balalarǵa arnalǵan mamandandyrylǵan mektep-ınternatqa alynyp, sonda oqıtyny olardyń óz sheberlikterin jetildire túsýine múmkindik beredi.
