Oralda qaıtys bolǵan sýdıanyń uly sot arqyly 48 mln teńge óndirdi

ASTANA. KAZINFORM – Oralda qaıtys bolǵan sýdıanyń uly sot arqyly 48 mln teńge óndirdi. 

Kazinform budan buryn jazǵanyndaı, Oral qalalyq sotynyń sýdıasy Nurlan Ǵubashev 2023 jyly 10 naýryz kúni tańmen kóz jumǵan bolatyn. 1968 jylǵy er adam jumys ornynda es-tússiz qulap, júregi toqtap qalǵandyqtan, jedel járdem kelgenge deıin qaıtys bolyp ketken edi.

Komıssııa jazataıym oqıǵanyń onyń eńbek qyzmetine baılanysty emestigin alǵa tartyp, esepke jatpaıdy degen qorytyndyǵa kelgen. Bas eńbek ınspektory komıssııanyń sheshimin durys dep tapqan. 

Munymen kelispegen sýdıanyń uly sotqa júgingen. 

Sotta anyqtalǵanyndaı, sýdıa joǵary oqý ornynda bilim alatyn ulyn jalǵyz ózi tárbıelegen. Talap aryz berýshi ákesiniń ólimi qyzmet babyn atqarý kezinde bolǵan dep tanyp, sottan N.Ǵubashevtiń Oral qalalyq tergeý sotynyń tóraǵasy qyzmetin atqarǵan kezindegi aılyq jalaqysynyń alpys eselengen kóleminde 48 mln 47,340 myń teńgeni birjolǵy ótemaqy esebinde óndirýdi ótingen. Sýdıanyń aılyq jalaqysy 800 789 teńge bolǵan.

Sotta jaýap bergen tergeý sotynyń qyzmetkerleri sýdıa N.Ǵubashevtiń 10 naýryz kúni materıaldy qaraý kezinde sot sheshimin shyǵarý úshin kabınetine ketkenin aıtty. Normatıvtik-quqyqtyq aktilerdi zertteý kezinde ol ústelge eńkeıip, qoryldap, sosyn edenge qulap túsken. Sol boıda jedel járdem shaqyrylǵan. Kelgen dárigerler onyń ólimin tirkegen. Kýálar sol kúni sotta óte úlken júkteme bolǵanyn málimdegen. 

Іsti qaraǵan Oral qalasy №2 soty Nurlan Ǵubashevtiń ólimi qyzmettik mindetin atqarý kezinde bolǵan dep tanyp, ulynyń paıdasyna BQO sot ákimshiligi departamentinen 48 mln 47,340 myń teńgeni óndirý jóninde sheshim shyǵardy.

Sot sheshimi kúshine endi.