Oralda qatty aıaz: 1-9 synyp oqýshylary qashyqtan oqıdy
ORAL. QazAqparat - Oralda qatty aıazǵa baılanysty birinshi aýysymdaǵy 1-9 synyp oqýshylary qashyqtan oqıdy, dep habarlaıdy QazAqparat tilshisi.
BQO gıdrometeorologııa ortalyǵynyń málimeti boıynsha, jergilikti saǵat 07.00-de temperatýra tili 27 gradýs aıazdy kórsetti.
Jeldiń jyldamdyǵy – sekýndyna 2 metr.
Eske sala keteıik, 24 aqpan kúni Oralda 1-aýysymdaǵy bastaýysh synyptar mektepke barmaǵan bolatyn.
Buǵan deıin habarlaǵanymyzdaı, búgin aýa raıyna baılanysty Nur-Sultan, Qaraǵandy, Kókshetaý, Atyraý qalalarynda jáne Soltústik Qazaqstan oblysynda birinshi aýysymdaǵy oqýlar onlaın formatqa aýystyryldy.
Sınoptıkter 25-27 aqpan aralyǵynda elimizdiń basym bóliginde aıazdar saqtalatynyn eskertti. Sondaı-aq jekelegen óńirde qar jaýyp, boran soǵatyny aıtyldy.
