Oralda qatty turmystyq qaldyqtar polıgonynyń órtenýine baılanysty kásiporynǵa aıyppul salyndy
ORAL. KAZINFORM — BQO boıynsha ekologııa departamenti zerthanalyq-taldamalyq baqylaý bóliminiń mamandary Oraldaǵy qatty turmystyq qaldyqtar polıgony sanıtarııalyq-qorǵaý aımaǵynyń shekarasynda atmosferalyq aýanyń sapasyna ólsheý jumystaryn júrgizdi.
Departament basshysy Murat Ermekqalıevtiń Kazinform tilshisine málim etkenindeı, sondaı-aq Qazaqstan Respýblıkasy Kásipkerlik kodeksiniń 144-baby 5-tarmaǵy 5) tarmaqshasyna sáıkes polıgondy basqarýǵa alǵan «ICM Recycling» JShS-ne qatysty jospardan tys tekserý júrgizildi.
— Tekserý qorytyndysy boıynsha Ákimshilik quqyq buzýshylyq týraly kodeksiniń 344-babynyń 4-bóligine sáıkes qaldyqtardy basqarý jónindegi operatsııalarǵa qoıylatyn ekologııalyq talaptardy buzǵany úshin kásiporyn ákimshilik jaýapkershilikke tartylyp, oǵan 50 AEK kóleminde aıyppul salyndy. Budan bólek, anyqtalǵan zań buzýshylyqtardy joıý týraly nusqama berildi, — dedi Murat Ermekqalıev.
BQO TJ departamentiniń málimetine sáıkes, polıgondaǵy órtti sóndirý jumystary janǵysh qaldyqtardyń kóp bolýy men kúnniń ystyǵyna baılanysty kúrdeli jaǵdaıda júrgizildi. Qazirgi ýaqytta «tilsiz jaý» tolyǵymen aýyzdyqtaldy. Órttiń polıgon aýmaǵynan tys jerlerge jáne eldi mekenderge taralýyna jol berilgen joq.
Eske sala keteıik, budan buryn Oralda qatty turmystyq qaldyqtar polıgony órtengenin jazǵan edik.
Sonymen qatar Oral turǵyndary polıgon tútininen tynys alý qıyndaǵanyn aıtyp shaǵymdandy.
