Oralda qatty turmystyq qaldyqtar polıgonynan taǵy da órt shyqty
ORAL. KAZINFORM — Oral qalasyna qarasty Zachagan kentinen 15 shaqyrym qashyqtyqta ornalasqan qatty turmystyq qaldyqtar polıgony otqa orandy.
Qoǵam belsendisi, ekolog Dáýrenbek Sahymnyń málim etkenindeı, polıgon qatty janyp jatyr. Jel kúshti. Endi qala halqyna úılerdiń terezelerin jaýyp, tútinnen qorǵanýyna týra keledi.
Osyǵan oraı Kazinform tilshisi BQO TJ departamentine arnaıy saýal joldaǵan edi.
Departamenttiń baspasóz qyzmeti Zachagan kentindegi qatty turmystyq qaldyqtar polıgonynda qoqystyń janǵanyn rastady.
Oqıǵa ornyna TJM bólimsheleri jedel jetip, órttiń odan ári taralýyna jol berilmegen. Órt 500 sharshy metr aýmaqta oqshaýlandy. «Tilsiz jaýdy» aýyzdyqtaýǵa BQO TJ departamentinen 26 adam, 8 tehnıka, jergilikti atqarýshy organdardan 3 adam, 3 tehnıka jumyldyryldy.
— Qazirgi ýaqytta qoqystyń janyp jatqan ýchaskelerine sý quıylyp, sý tógilgen jáne órt sóndirilgen aýmaqtar topyraqpen jabylýda. Órtti tolyq sóndirý jumystary jalǵasýda. Jaǵdaı TJM baqylaýynda, — dep habarlady vedomstvodan.
Bul Oraldaǵy qatty turmystyq qaldyqtar polıgonynyń birinshi ret órtenýi emes. Mundaı oqıǵa ótken jyldary da, bıyl da oryn alǵan edi.
Eske sala keteıik, budan buryn Oralda qatty turmystyq qaldyqtar polıgony órtengenin jazǵan edik.
Sondaı-aq Oralda tótenshe jaǵdaı jarııalandy.
