Oralda qatty turmystyq qaldyqtar polıgony órtenip jatyr

Oral qalasy ákimdiginen málim etkenindeı, aptap ystyqqa baılanysty Zachagan kentinen shamamen 15 shaqyrym jerde ornalasqan polıgon aýmaǵynda shyqqan órttiń jalpy aýmaǵy 12 gektar boldy. 

Órt týraly habar túsken sátten bastap «tilsiz jaýdy» oqshaýlaý jáne sóndirý jumystary dereý uıymdastyryldy. Túni boıy oqıǵa ornynda tótenshe jaǵdaılar departamentiniń kúsh-quraldary (42 qyzmetker men 11 tehnıka), sonymen qatar jergilikti atqarýshy organdardyń 25 qyzmetkeri jáne 25 tehnıkasy jumys istedi.

— Órt oshaqtaryna úzdiksiz sý berilip, sóndirilgen aýmaqtar topyraqpen jabylyp jatyr. Qazirgi ýaqytta jumystar jalǵasýda. Búgin 49 tehnıka jumyldyryldy. Jaǵdaı turaqty baqylaýda. Órtti tolyq sóndirý jáne tútinniń taralýyn barynsha azaıtý úshin barlyq qajetti is-sharalar qabyldanyp jatyr, — dep habarlady ákimdikten.

Keshe Han toǵaıynda da órt bolǵandyqtan, búgin tańmen qalany tútin basty. 

Eske sala keteıik, budan buryn Batys Qazaqstanda ormandaǵy órtti sóndirýge tikushaq tartylǵanyn jazǵan edik. 

Sondaı-aq Oral qalasynda Han toǵaıy otqa orandy.