Oralda kásipker memlekettik jer telimine zańsyz kirip ketken
ORAL. KAZINFORM – Oral qalasy ortalyǵynda keńse ǵımaratyn salyp jatqan kásipkerdiń zańdy buzǵany jóninde áleýmettik jelide beınejazba tarady.
Beınejazbada qala turǵyny Abaı dańǵyly men Qurmanǵazy kóshesi qıylysyndaǵy (Abaı dańǵyly 53/1) jer ıesiniń úı aýlasyna kiretin tusty jaýyp, qorshaýdy trotýarǵa turǵyzǵanyn, sonyń saldarynan avtokólikter kirip-shyǵa almaıtynyn aıtady. Al jaıaý adamdar avtokólik jolymen júrýge májbúr.
Ekolog Darhan Sarıevtiń sózine qaraǵanda, buryn bul aýmaq Oral armatýra zaýytyna tıesili bolǵan. Bos jatqan jerge aǵashtar ózdiginen óskenimen, ol skver retinde rásimdelmegen. Keıin bul jer jekege berilgen.
Qala turǵyndary atalmysh aýmaqty skver retinde túsingendikten, bıyl kóktemde aǵashtar otalyp tastalǵan kezde narazylyq tanytqan bolatyn.
Kásipker Tımýr Qabdyǵalıev Instagram áleýmettik jelisinde Abaı dańǵyly 55 jáne Qurmanǵazy kóshesi 156/1-mekenjaı turǵyndarymen kezdesýinde málim etkenindeı, bul jerdi ol ótken jyly satyp alǵan. Atalmysh aýmaqtan 17 aǵash kesilgen. Sonyń ornyna qalanyń ár jerinen 215 túp terek otyrǵyzyp, ony ósirýge mindettengen.
– Bul orynda úsh qabatty bıznes ortalyǵyn salǵym keledi. Onyń birinshi qabatynda qoǵamdyq tamaqtandyrý orny bolady. Ekinshi jáne úshinshi qabatynda keńseler ornalasady. Sondaı-aq osy aýmaqta abattandyrý jumystaryn da júrgizemin, - deıdi kásipker.
Osy máselege baılanysty Kazinform tilshisi Oral qalasy ákimdigine arnaıy saýal joldaǵan bolatyn.
Ákimdik málimetine qaraǵanda, Oral qalasy jer qatynastary bóliminiń mamany Abaı dańǵyly 53/1-mekenjaıynda salynyp jatqan qurylys nysanyn teksergen.
– Tekseris barysynda atalǵan mekenjaıda qaqpalar zańsyz ornatylǵany belgili boldy. Jer paıdalanýshy tarapynan zańdylyqtyń buzylǵany, atap aıtqanda, memlekettik jer telimin ózdiginen basyp alý deregi anyqtaldy. Osyǵan baılanysty QR Jer kodeksiniń 145-babyna sáıkes tekserý is-sharalaryn júrgizý úshin bıylǵy 16 qyrkúıekte Batys Qazaqstan oblysynyń jer resýrstaryn basqarý departamentine hat joldandy, - delingen resmı jaýapta.
Eske sala keteıik, budan buryn ekologtyń ár qalada kólemi 30 gektar bir park salynsa, artyq bolmaıtyny jóninde jazǵan edik.
Sondaı-aq Oralda emhana aldyndaǵy eski skver joıylyp kete me, soǵan baılanysty ákimdik jaýap berdi.