Oralda kásipker áıeldiń jaýapkershilikke negizsiz tartylǵany anyqtaldy

ORAL. KAZINFORM – Oral qalasynyń ákimshilik quqyq buzýshylyqtar jónindegi mamandandyrylǵan soty kásipker Sh-ǵa qatysty ákimshilik quqyq buzýshylyq týraly isti qarady. 

BQO sotynyń baspasóz qyzmetinen málim etkenindeı, is QR Ákimshilik quqyq buzýshylyq týraly kodeksiniń 479-baby boıynsha polıtsııanyń qylmystyń aldyn alý sharalaryn qabyldaý týraly usynysyn oryndamaǵany úshin qozǵalǵan.

Sot talqysynda anyqtalǵanyndaı, 2024 jyldyń tamyz aıynda Shaǵan polıtsııa bóliminiń tergeýshisi, leıtenant H. óziniń óndirisindegi qylmystyq iske baılanysty jaǵdaılardy joıý talabymen «Avicenna» klınıkasyna usynys jiberdi. Qujat ınternetten alynǵan mekenjaı boıynsha joldanyp, ony azamatsha Sh. qabyldaǵan.

Tergeý málimetinshe, zańǵa sáıkes azamatsha Sh. bir aı ishinde jaýap berýge mindetti bolǵan, alaıda bul talap oryndalmady. Sotta polıtsııa qyzmetkeri K. istiń azamatsha Sh-ǵa qatysty qozǵalǵanyn jetkizdi, sebebi usynysty qabyldaǵany týraly onyń qoly qoıylǵan.

Sot otyrysynda Sh. «Avicenna» klınıkasynyń basshysy emestigin, tek bul ǵımarattyń ıesi ekenin jáne ony jalǵa beretinin aıtty. Polıtsııanyń usynysy qate jiberilgenin, sebebi «Avicenna» zańdy tulǵa retinde tirkelmegenin jáne klınıkanyń tek jaldaý sharty negizinde jumys isteıtinin túsindirdi. Ol ózine tıesili emes uıymdarǵa nemese zańdy tulǵalarǵa jiberilgen usynystardy oryndaýǵa mindetti emes ekenin atap ótti. Bul ýájder sottaǵy materıaldarmen rastaldy.

Sot dáleldemelerdi zertteı otyryp, azamatsha Sh-nyń áreketterinde ákimshilik quqyq buzýshylyq quramy joq degen qorytyndyǵa keldi. Sebebi ol polıtsııanyń usynys talaptary qoldanylatyn sýbekt bolyp tabylmaıdy. QR Ákimshilik quqyq buzýshylyq týraly kodeksiniń 10-babyna sáıkes kinásizdikke qatysty barlyq kúmándar jaýapqa tartylyp otyrǵan tulǵanyń paıdasyna sheshilýi tıis.

Atalǵan kodekstiń 741-baby 2-bóligine sáıkes sot ákimshilik quqyq buzýshylyq týraly is júrgizýdi quqyq buzýshylyq quramynyń bolmaýyna baılanysty toqtatty.

- Sot bul iste ákimshilik is qozǵaý rásiminiń buzylǵanyn anyqtap, Oral qalasy polıtsııa basqarmasy basshylyǵyna jeke qaýly shyǵardy. Qaýlyda kásipker áıeldi negizsiz jaýapkershilikke tartýǵa jol bergen laýazymdy tulǵalarǵa qatysty shara qoldaný suraldy. Bul is kinásizdik prezýmptsııasyn saqtaýdyń jáne ákimshilik is qozǵaý aldynda barlyq mán-jaılardy muqııat tekserýdiń mańyzdylyǵyn kórsetti. Sot negizsiz aıyptaýlardyń istiń toqtatylýyna ǵana emes, sondaı-aq tártip buzǵan qyzmetkerlerdiń jaýapkershilikke tartylýyna ákelýi múmkin ekenin eskertti, - dep habarlady vedomstvodan.

Eske sala keteıik, budan buryn BQO-da shekarada qyzmetine salǵyrt qaraǵan áskerı qyzmetshiniń qamaýǵa alynǵanyn jazǵan bolatynbyz.