Oralda kásiporynǵa 11 mln. astam teńge zalal keltirgen azamat sottaldy
ORAL. Shildeniń 12-si. QazAqparat /Eljan Eraly/ - BQO boıynsha ekonomıkalyq qylmysqa jáne sybaılas jemqorlyqqa qarsy kúres departamenti Erlan Ábýevke qatysty qylmystyq isti aıaǵyna deıin jetkizdi.
Departamenttiń baspasóz qyzmetinen QazAqparat tilshisine habarlaǵanyndaı, atalǵan azamat 2008 jylǵy shildede, tergeý barysynda anyqtalmaǵan tulǵalarmen qylmystyq ymyralasýǵa kelip, «Aqtóbe-Álem» JSSh-niń tirkeý qujattarynyń kóshirmelerin ıemdenip alǵan. Keıin ózin atalmysh JShS-niń dırektory dep tanystyryp, Atyraý qalasyndaǵy «KF Tıtan Metall» JShS -niń ókiline metall jaımalaryn alý jóninde «Aqtóbe-Álem» JSSh-niń atynan ótinim bergen. Usynylǵan qujattardyń negizinde metall jaımalaryn jetkizý jóninde kelisim jasalyp, E.Ábýev Oral qalasyndaǵy «KF Tıtan Metall» JShS-ne kelip, qoımadan jalpy somasy 11 mln. teńgeden astam 61 370 kg. metall jaımalaryn alǵan. Budan soń metall jaımalaryn Atyraý qalasyna shyǵaryp, qylmys jasaǵan ornynan boı tasalaǵan. E.Ábýevtiń qylmystyq is-áreketiniń nátıjesinde «KF Tıtan Metall» JShS-ge kórsetilgen somaǵa materıaldyq shyǵyn keltirilgen.
Oral qalalyq soty E.Ábýevti QR QK 177-baby 3-bólimi «b» tarmaǵy boıynsha kináli dep tanyp, shartty túrde 5 jylǵa bas bostandyǵynan aıyrýǵa, 3 jyl synaý merzimin belgileýge úkim etti.
5,5 mln. teńgeniń múlkin tutqyndaý jolymen keltirilgen shyǵyn ishinara óndirilip alyndy.
