Oralda kásipkerler sambodan álem chempıonyna páter alyp berdi
ORAL. QazAqparat - Oralda sambodan álem chempıony Nurbol Serikovke eki bólmeli páterdiń kilti tabys etildi, dep habarlaıdy QazAqparat tilshisi.
El namysyn abyroımen qorǵap júrgen sańlaq palýanǵa batysqazaqstandyq kásipkerler osyndaı syı jasady.
Atap aıtqanda, jalpaqtaldyq Turarbek Tilemisov, Qaınar Esmuhanov, Aleksandr Qaraǵoıshın, Álibek Sartaev, Berik Qurmanǵalıev jáne Samat Hasanov Nurbolǵa óz qarajattaryna páter satyp alyp berdi.
Qazaqstandyq samboshy ótken jyly Rýmynııa astanasy Býharestte ótken álem chempıonatynda top jarǵan bolatyn. Qaztalov aýdany Aqpáter aýylynda týyp-ósken onyń alǵashqy bapkeri Jeńis Stamǵazıev bolsa, qazir Qazaqstannyń eńbek sińirgen jattyqtyrýshysy Raıbek Meńdiǵalıevtiń qol astynda shyńdalýda.
«Jastar jylynda maǵan osyndaı tartý jasaǵan jerles aǵalaryma alǵysymdy bildiremin. Bul - men úshin erekshe qoldaý. Bıylǵy álem chempıonaty 8-10 qarashada Koreıa astanasy Seýlde ótedi. Oǵan joldama alý úshin birneshe iri halyqaralyq jarysqa qatysyp, irikteýden ótý kerek. Mysaly, naýryz aıynda Máskeýde ótetin «A.Harlampıev memorıaly» álem kýbogy saıysyna qatysqaly otyrmyn. Birneshe kúnnen keıin Rıazan qalasyna attanamyz. Onda jattyǵýmen birge Reseı, Grýzııa, Ýkraına, Armenııa, Belarýs palýandarymen sheberlik almasamyz. Sáýirde Semeıde Qazaqstan chempıonaty ótedi, odan keıin Azııa birinshiligi de bar. Eń bastysy, baıraqty básekelerde tabysty óner kórsetip, elimizdiń kók baıraǵyn jelbiretsem deımin», -dedi QazAqparat tilshisine Nurbol Serikov.
Eske sala keteıik, biz budan buryn N.Serikovtiń álem chempıony atanǵanyn jazǵan bolatynbyz.
