Oralda kásipker jer telimin 16 mln teńgege satyp aldy
ORAL. QazAqparat - Búgin Oralda bes jer telimi aýktsıonǵa shyǵarylyp, sonyń tórteýi satyldy, dep habarlaıdy «QazAqparat» tilshisi.
Krýgloozernyı men Derkól kentterinen eki-ekiden jáne Oral qalasynyń Eski áýejaı aýdanynan bir jer telimin kommertsııalyq baǵyttaǵy nysandar qurylysy úshin úsh jylǵa jaldaý quqyǵyn satyp alýǵa barlyǵy 29 adam ótinish túsirip, sonyń 21-i aýktsıonda baq synady.
Oral qalasy ákimdiginde aǵylshyn tásilimen ótken aýktsıon kezinde aldymen Krýgloozernyı kentindegi jer telimine eki kásipker qyzyǵýshylyq bildirip, sonyń bireýi 78 myń teńgege (bastapqy baǵasy - 48 myń teńge) satyp aldy. Ekinshi lot boıynsha bir ǵana kásipker qatysqandyqtan, ol ótpedi dep sanalyp, kelesi jylǵa qaldyryldy.
Derkól kentindegi 4 sotyq jer telimin (bastapqy baǵasy - 53 myń teńge) satyp alýǵa segiz adam qatysyp, «RKZ grýpp» JShS ókili Rınat Qadyrǵalıevtiń aty ozdy. Jer telimin 2,525 mln teńgege satyp alǵan onyń sózine qaraǵanda, mundaı ashyq aýktsıondar qatysýshylarǵa teń múmkindik beredi. Derkóldegi taǵy bir osyndaı kólemdegi, tórt adam qatysqan jer telimi 53 myńnan 1,8 mln teńgege deıin kóterildi.
Eń qyzý ótkeni Eski áýejaı aýdanyndaǵy 20 sotyq jer telimi (bastapqy quny - 330 myń teńge) boldy. Oǵan 14 adam qatysyp, qorytyndysynda jer telimin oraldyq kásipker 16 mln teńgege satyp aldy.
Aıta keteıik, bul - osymen Oralda ótken ekinshi aýktsıon. Kelesi aýktsıon aldaǵy jyldyń basynda uıymdastyrylmaq. Eger satyp alýshylar jer telimin úsh jyl maqsatty túrde paıdalanbaǵan jaǵdaıda QR Jer kodeksiniń 92 jáne 94-baptaryna sáıkes keri qaıtarylady. Jalǵa alý quqyǵynyń úsh jyldyq merzimi bitken soń kásipker jer teliminiń kadastrlyq qunyn qosa tólep, óz menshigine aýdara alady.
