Oralda kásipker oblystyq aýrýhanaǵa ottegi kontsentratoryn tartý etti

ORAL. QazAqparat – Oraldyq kásipker Qanat Janǵazıev oblystyq kópbeıindi aýrýhanaǵa ottegi kontsentratoryn tartý etti, dep habarlaıdy QazAqparat tilshisi.

«Davıd Stroı» JShS dırektory Qanat Janǵazıev quny 2 mln astam teńgeni quraıtyn 3 tynys alý apparatyn alyp berdi.

Oblystyq aýrýhana dırektory Arman Baıdeýov qazirgideı kúrdeli kezeńde qolushyn sozyp jatqan jandarǵa rızashylyǵyn bildirip, ottegi kontsentratorlarynyń emdeý mekemesiniń №1, №3 jáne №8 korpýstaryna ornalastyrylatynyn jetkizdi. Munda provızorlyq statsıonarǵa kúnine jıyrmadan astam naýqas túsedi. Endi dárigerler emdelýshilerge ottegi kontsentratorynyń kómegimen ýaqtyly járdem kórsete alady.

Oblystyq aýrýhanaǵa memleket tarapynan da qoldaý kórsetilýde. Jýyrda osynda 150 tósek-orynǵa eseptelgen provızorlyq statsıonar ashylyp, onda 150 ottegi kontsentratoryn ornatý kózdelýde.

«Elimizde kún saıyn indettiń beleń alyp bara jatqany belgili. Osy oraıda árkim qolynan kelgenin jasap, indetpen kúreske úles qosýy kerek dep oılaımyz. Bizdiń bul isimizdi basqa da kásipkerler qoldasa eken deımiz», dedi Qanat Janǵazıev.

Eske sala keteıik, budan buryn BQO-da koronavırýsqa shaldyqqan 92 naýqastyń aýyr halde jatqanyn jazǵan bolatynbyz.