Oralda kásipker áıeldi óltirgen turǵyn sottaldy
ORAL. QazAqparat - BQO qylmystyq ister jónindegi mamandandyrylǵan aýdanaralyq sotynyń úkimimen Á.Asylbekov QR QK 99-baby 1-bóligine sáıkes aıypty dep tanyldy, dep habarlaıdy QazAqparat tilshisi.
Sot talqysynda belgili bolǵanyndaı, 28 jasar aıyptalýshy 19 naýryzǵa qaraǵan túni óziniń týǵan kúnin dostarymen birge «Golden Palasta» atap ótken.
Sodan keıin «Kaktýs» dısko-baryna baryp, sonda dostarymen bolǵan kásipker Jámıla Jumaǵazıevamen tanysady. Sosyn «Kaktýstan» shyǵyp, synyptasy Zaınýshev jáne Jumaǵazıevamen birge taksıge otyryp, Zachagan kentine bet alady. Avtokólikte Jumaǵazıeva Asylbekovtiń mańdaıyn jaralaıdy. Jaýap retinde Asylbekov oǵan judyryq jumsap, aıaǵymen tebedi. Synyptasy ekeýi mashınadan áıeldi alyp shyǵyp, Jambyl kóshesi 75-úıdiń aýlasyna aparady. Zaınýshev Jumaǵazıevanyń sómkesin alyp kelýge ketken kezde Asylbekov jábirlenýshige aıaq-qolyn birdeı jumsap, tunshyqtyryp óltiredi.
Sot Á.Asylbekovti kisi óltirgeni úshin aıypty dep tanyp, 12 jylǵa bas bostandyǵynan aıyrý jazasyn qaýipsizdigi joǵary qylmystyq-atqarý júıesi mekemesinde óteýge kesti. Sondaı-aq ol jábirlenýshi tarapqa materıaldyq shyǵyn esebinde 903 myń teńge jáne moraldyq zalal retinde 3 mln teńge tóleıdi.
Sot sonymen qatar, Zaınýshevke qatysty QR QK 434-babyna sáıkes (qylmys týraly habarlamaý) jeke qaýly shyǵardy. Bul bap boıynsha ol alty myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne alty jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
Sot úkimi zańdy kúshine engen joq.
Eske sala keteıik, budan buryn Oralda áıeldiń múrdesi tabylyp, soǵan baılanysty kúdiktiniń ustalǵanyn jazǵan bolatynbyz.
