Oralda qarjylyq pıramıda qurý deregine baılanysty is tergelýde

ORAL. QazAqparat - Oral qalasy prokýratýrasy «Questra World» qarjylyq pıramıda qurý deregin anyqtady, dep habarlaıdy «QazAqparat» tilshisi.

Oblys prokýratýrasynyń baspasóz qyzmetinen túsken málimetke qaraǵanda, jergilikti turǵyndardyń qarjylyq saýaty tómendigin paıdalana otyryp, birqatar kompanııalar qazaqstandyqtardy qarjylyq pıramıdaǵa tartý isin belsendi júrgizýde.

Sońǵy kezde BAQ-ta «Questra Holdings Inc.» atty qarjylyq pıramıda jıi talqylanýda. Tekserý barysynda Oraldaǵy saýda ortalyqtarynyń birinde «Questra World» kompanııasynyń mekenjaıy oryn tepkeni belgili boldy. Jınalǵan derekter qylmystyq belgiler bar ekendigin kórsetti. Osyǵan baılanysty prokýratýranyń usynysyna sáıkes Oral qalalyq ishki ister basqarmasy QR QK 190-baby 1-bólimine sáıkes (alaıaqtyq) qylmystyq is qozǵap, sotqa deıingi tergeýdi bastady.