Oralda qarjy pıramıdasyn qurǵan zergerlik salon anyqtaldy
ORAL. QazAqparat – Oralda qarjy pıramıdasyn qurǵan zergerlik salon anyqtaldy, dep habarlaıdy QazAqparat tilshisi.
BQO boıynsha ekonomıkalyq tergeý departamentinen túsken málimetke qaraǵanda, qazirgi kezde qala turǵynynyń aryzy negizinde qarjy pıramıdasyn qurý deregi boıynsha tergeý júrgizilýde.
Aryzdanýshy «B28 Jewelry» zergerlik salonynda 45 myń teńgege zergerlik buıymdarǵa sertıfıkattar satyp alǵan. Kompanııa oǵan apta saıyn sertıfıkat qunynyń 7 paıyzy kóleminde syıaqy, oǵan qosa aldaǵy ýaqytta jylyna 364 paıyz deńgeıinde tabysqa jetýge ýáde bergen. Alaıda zergerlik salon basshylyǵy qarajat salý shartyn oryndamaı, aryzdanýshyny aldap, aqshasyn ıemdenip alǵan.
Salon qyzmetkerleri áleýmettik jeliler men messendjerler arqyly aqysy 15 myń teńgeden bastalatyn «sertıfıkattarǵa» aqsha salymyn jasaýdy syltaýratyp, qarjy pıramıdasynyń jańa qatysýshylaryn tartyp otyrǵan.
QR QK 217-babyna sáıkes qarjy (ınvestıtsııalyq) pıramıdany qurý jáne oǵan basshylyq etý úshin qylmystyq jaýapkershilik qarastyrylǵan (aıypty adam múlki tárkilenip, úsh myń AEK-ke deıingi mólsherde aıyppul salýǵa ne segiz júz saǵatqa deıingi merzimge qoǵamdyq jumystarǵa tartýǵa ne úsh jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady).
«Turǵyndar «B28 Jewelry» zergerlik salonynyń osyndaı zańsyz qyzmetinen zardap shekken bolsa, departamenttiń senim telefonyna qońyraý shala alady: 8-7112-53-84-27», dep habarlady BQO boıynsha ekonomıkalyq tergeý departamenti.
Eske sala keteıik, budan buryn BQO-da birneshe turǵynnyń esirtki zattarymen ustalǵanyn, Oralda polıtseılerdiń balyq tıelgen eki kólikti qolǵa túsirgenin jazǵan bolatynbyz.
