Oralda qarjy pıramıdasy arqyly 68 mln teńge jymqyrǵan áıeldiń isin sot qarap jatyr
ORAL. QazAqparat – Oralda qarjylyq pıramıda arqyly 68,5 mln astam teńge jymqyrǵan áıeldiń isi sotqa berildi, dep habarlaıdy QazAqparat tilshisi.
BQO boıynsha ekonomıkalyq tergeý departamenti málim etkenindeı, Memleket basshysy bıylǵy aqpan aıynda quqyq qorǵaý organdary men qarjy qurylymdarynyń basshylarymen kezdesýde qarjy pıramıdasyn qurǵan keıbir uıymdardyń zańsyz áreketterine nazar aýdaryp, osyny egjeı-tegjeıli tekserýdi tapsyrǵan bolatyn.
Prezıdent tapsyrmasyn oryndaý maqsatynda QR Qarjy mınıstrliginiń Qarjy monıtorıngi komıteti aýmaqtyq departamentterdiń jumysyn erekshe baqylaýǵa aldy.
Qazirgi kezde BQO boıynsha ekonomıkalyq tergeý departamentinde QR QK 217-babyna (qarjylyq pıramıdany qurý jáne oǵan basshylyq etý) sáıkes birneshe qylmystyq is tirkelgen.
Sonyń ishinde «Lıder» jáne «Altyn tumar» qarjylyq pıramıdasyn qurǵan Ch. degen áıelge qatysty tergeý amaldary aıaqtaldy. Alaıaq áıel azamattarǵa tez arada baııtynyna jáne aqshany keıin eki ese tóleıtinine ýáde berip, olardyń 68 567 056 teńgesin jınap alǵan. Bul qarjylyq pıramıdaǵa 2 myńnan astam adamnyń qatysy bar.
Eske sala keteıik, budan buryn jalǵan shot-faktýra jazǵan oraldyq kásipkerge 6,3 mln teńge aıyppul salynǵanyn jazǵan bolatynbyz.
