Oralda káriz sýynyń Shaǵan ózenine quıylyp jatqany ras pa

ORAL. KAZINFORM – Oral qalasynda káriz sýynyń Shaǵan ózenine quıylyp jatqany jóninde áleýmettik jelide beınejazba tarady.

Beınejazbada er adam Shaǵan ózeninen ótetin kópir mańynda káriz sýynyń turba arqyly ózenge aǵyp jatqanyn aıtady.

- Káriz sýynyń ózenge aǵýy úshin turbany ádeıi istegen be? Las sý Shaǵanǵa, odan Jaıyqqa quıylady. Búgin 7 naýryz, keshki saǵat 18.00, - deıdi turǵyn.

«Batys sý arnasy» JShS-nyń baspasóz qyzmetinen túsken málimetke qaraǵanda, 7 naýryz kúni saǵat 20.30-da 18A kárizdik sorǵy stansasyna baǵyttalǵan dıametri 600 mm qysymdy káriz qubyrynyń tehnıkalyq shuńqyrynda apatty jaǵdaı oryn aldy.

- Apattyń ári qaraı órshýine jol bermeý úshin shuǵyl túrde káriz qubyrlaryn paıdalaný ýchaskesi jumys tobynyń kúshimen qosymsha káriz qubyryna qaıta qosý jumystary júrgizildi. Qazirgi ýaqytta káriz qudyǵy aımaǵyna shyqqan aǵyndy sýlardy tartý jumystary júrgizilip jatyr. Oǵan qosa apatty joıý jumystaryna kerekti jabdyqtar daıyndalý ústinde, - delingen resmı málimette.

BQO boıynsha ekologııa departamentiniń basshysy Murat Ermekqalıevtiń Kazinform tilshisiniń saýalyna oraı málim etkenindeı, oqıǵa ornynan synama alynyp, sonyń qorytyndysyna sáıkes tıisti sheshim qabyldanady.

Jaıyq-Kaspıı basseındik ınspektsııasynyń Batys Qazaqstan oblysy boıynsha bólim basshysy Qanat Óteǵalıev tabıǵat qorǵaý polıtsııasy materıal toltyryp jiberse, quzyret sheginde QR Ákimshilik quqyq buzýshylyq týraly kodeksiniń 358-babyna sáıkes ákimshilik shara qoldanylatynyn jetkizdi.

Eske sala keteıik, budan buryn Oralda turǵyndar qardyń sý qorǵaý aımaǵyna tógilip jatqany týraly dabyl qaqqanyn jazǵan edik.

Oralda qardyń sý qorǵaý aımaǵyna shyǵarylýyna baılanysty ákimdikke aıyppul salyndy.