Oralda káriz kollektoryndaǵy apattan keıin jóndeý jumysy jalǵasyp jatyr
ORAL. KAZINFORM – Oral qalasynda káriz kollektoryndaǵy apattan keıin jóndeý jumystary jalǵasyp jatyr.
«Batys sý arnasy» JShS baspasóz qyzmetinen málim etkendeı, káriz kollektorynda dıametri 1000 mm sý qubyryndaǵy aqaýǵa baılanysty 11 aqpan kúni saǵat 17.00-den bastap qalanyń ortalyq bóligi men Zachagan kentinde salqyn sý berýge shekteý qoıyldy.
«Mekeme kúshimen apatty jaǵdaıdy qalpyna keltirý jumystary júrgizilip, 12 aqpan kúni saǵat 02.30-dan qalaǵa qaıtadan salqyn sý berile bastady. Qazirgi kezde jumys jalǵasýda. Salqyn sý berýge shekteý engizilýi múmkin. Sondyqtan Oral qalasy turǵyndarynan qajetti sý qoryn jasaqtap alýdy ótinemiz» dep habarlady vedomstvodan.
Eske sala keteıik, budan buryn Oralda qubyr jarylyp, kósheni sý basqanyn jazǵan bolatynbyz.
