Oralda qarııalarǵa qurmet kórsetildi
ORAL. QazAqparat - Búgin Oralda Halyqaralyq qarııalar kúnine oraı «Ásem» meıramhanasynda Uly Otan soǵysy ardagerleri men tyl eńbekkerleri jáne zeınetkerler bas qosyp, olarǵa qurmet kórsetildi.
Oral qalalyq jumyspen qamtý jáne áleýmettik baǵdarlamalar bólimi basshysynyń orynbasary Sáýle Sholanbaevanyń atap ótkenindeı, óńirde 1 qazanda bastalǵan dástúrli «Meıirbandyq kúnderi» qaıyrymdylyq aılyǵy aıasynda josparǵa sáıkes aı boıy is-sharalar uıymdastyrylyp, az qamtylǵan, jalǵyzilikti, múgedek jandarǵa kómek kórsetiletin bolady. Bul joly negizinen sonaý el basyna kún týǵan shaqta Otanymyzdy qorǵaǵan maıdangerler men tylda kún-tún demeı eńbek etken ardagerlerge arnalyp, dastarhan jaıyldy. Osyǵan oraı demeýshilik kórsetken «Ásem» meıramhanasynyń meńgerýshisi Zaıra Hamıtovaǵa alǵys aıtyldy. Sharany atalmysh bólimniń zeınetkerler men múgedekterge áleýmettik qyzmet kórsetý aýmaqtyq ortalyǵy (dırektory Arman Dáýletov) uıymdastyrdy.
-Osy sharany uıymdastyrýshylarǵa shyn júrekten alǵysymdy aıtamyn. Shyny kerek, jasymyz ulǵaıǵan soń, basymyz qosyla bermeıdi. Tátti taǵam onysyz da bar ǵoı, ózimiz shamalas zamandastarymyzben áńgime dúken quryp, bir jasap qaldyq. Ónerpazdarymyzdyń án-kúıine de rızamyz, - dedi Oralǵa qarasty Zashaǵan kentinde turatyn ardager-ustaz Sotsıal Pusyrman.
Shara barysynda Jastar mádenıet úıiniń ánshileri men «Aqjelken» balalar aýla klýbynyń balaýsa ártisteri óz ónerlerin kórsetip, qarııalardyń qoshemetine bólendi. Demeýshiler atynan maıdangerler men tyl eńbekkerlerine tartý-taralǵylar tabys etildi.
