Oralda karer sýynyń jasyl túske boıalýy turǵyndardy alańdatty
ORAL. KAZINFORM — Oral qalasyna qarasty Jelaev aýyly mańynda ornalasqan karerdiń sýy jasyl túske boıalǵany jóninde áleýmettik jelide beınejazba jarııalandy.
Osyǵan baılanysty turǵyndar pikirin jazyp, alańdaýshylyǵyn bildirdi. Olardyń keıbiri sol mańda monshanyń kóptigin, solardyń káriz sýyn karerge aǵyzýy múmkin ekendigin aıtty. Sonymen qatar bos qalǵan saıajaılarda qazir adamdar mal ustaıdy. Oǵan qosa qurylys qaldyqtary tastalady.
Atalmysh máseleni anyqtaý úshin Kazinform tilshisi BQO boıynsha ekologııa departamentine arnaıy saýal joldaǵan edi.
Departament basshysy Murat Ermekqalıevtiń málim etkenindeı, 13 qazan kúni karerden sý synamasy alynyp, hımııalyq taldaý júrgizilgen.
Onyń sózine qaraǵanda, zerthanalyq zertteý nátıjeleri boıynsha hımııalyq zattardyń belgilengen shekti raýaldy kontsentratsııalardan aspaıtyny anyqtaldy.
— Karer sýynyń jasyl túske boıalýy tabıǵı bıologııalyq úderisterge, atap aıtqanda, sýda mıkroskopııalyq baldyrlardyń qarqyndy kóbeıýine baılanysty bolýy múmkin. Mundaı qubylystyń paıda bolýyna sýdyń temperatýrasy, kún sáýlesiniń ótkirligi jáne sý quramyndaǵy qorektik zattardyń mólsheri áser etedi. Baldyrlardyń jappaı kóbeıýi sý túsiniń ózgerýine ákelýi múmkin jáne bul qubylys sýdyń hımııalyq lastanǵanyn bildirmeıdi, — dedi M.Ermekqalıev.
Eske sala keteıik, budan buryn BQO-da ruqsat etilmegen 110-nan astam qoqys úıindisi tirkelgenin jazǵan edik.
Sondaı-aq BQO-da Jaıyq ózenindegi sýdyń túsi nege ózgergeni jóninde ekologııa departamenti jaýap berdi.
Oralda stıhııalyq qoqys alańynda munaı kompanııasynyń qujattary shashylyp jatqany belgili boldy.
