Oralda qardy ýaqtyly tazalamaǵandarǵa 1,5 mln. teńgeden astam aıyppul salyndy

ORAL. QazAqparat - Oral qalasynda 2016 jylǵy 1 jeltoqsannan bergi mezgilde aýmaqty qardan tazalaý jóninde 412 habarlama jiberilip, QR Ákimshilik quqyqbuzýshylyq kodeksiniń 505-babyna sáıkes 63 ákimshilik hattama toltyryldy, dep habarlaıdy «QazAqparat» HAA tilshisi.

Oral qalalyq ishki ister basqarmasy jergilikti polıtsııa qyzmetinen túsken málimetke qaraǵanda, sonyń ishinde 1 mln. 590,750 myń teńge ákimshilik aıyppul salý jóninde 25 qaýly qabyldandy.

Bıylǵy jyl basynan beri QR Ákimshilik quqyqbuzýshylyq kodeksiniń 505-babyna sáıkes qalany abattandyrý erejesin buzýǵa qatysty 491 quqyqbuzýshylyq anyqtaldy.  477 azamatqa eskertý berilip, 14 qaýly negizinde 646,665 teńge aıyppul salynyp, sonyń 533,215 myń teńgesi óndirildi.

Sońǵy kúnderi 17 ákimshilik quqyqbuzýshylyq tirkeldi.

Sondaı-aq aýmaqty qardan tazartý jóninde 713, qalany abattandyrý erejesin buzýdy joıý jóninde 587 habarlama taratyldy.

Aıta keteıik, jergilikti polıtsııa qyzmetkerleri jergilikti atqarýshy organdar ókilderimen birlese otyryp, ótken jyly qalany abattandyrý erejesin buzýdy joıý jóninde turǵyndarǵa 9713 habarlama taratty. 2016 jyly 1114 quqyqbuzýshylyq tirkeldi, bul 2015 jylǵydan (867) 28,5 paıyzǵa artyq. Sonyń ishinde 1075 azamatqa eskertý berilip, 1 mln. 338,351 myń teńge ákimshilik aıyppul salý jóninde 39 qaýly shyǵaryldy. Sodan 596 myń teńgeni quraıtyn 11 aıyppul óndirildi (38,4 paıyz).