Oralda qardyń sý qorǵaý aýmaǵyna shyǵarylýyna baılanysty ákimdikke aıyppul salyndy
ORAL. KAZINFORM — Budan buryn jazylǵandaı, Oralda Teleortalyq mańyndaǵy qardyń sý qorǵaý aýmaǵyna tógilýine baılanysty turǵyndar dabyl qaqqan bolatyn.
Osyǵan oraı qandaı shara qoldanylǵany jóninde Jaıyq-Kaspıı basseındik ınspektsııasynan jaýap keldi.
Inspektsııa basshysy Ǵalıdolla Azıdýllın qol qoıǵan jaýaptan belgili bolǵanyndaı, 2025 jyly jeltoqsanda «Jaıyq taza qala» JShS Shaǵan ózenindegi sý qorǵaý aýmaǵyna qar shyǵarǵan kezde basseındik ınspektsııamen kelisim bolmaǵan.
Atalǵan derekke sáıkes Oral qalalyq ishki ister basqarmasy Abaı polıtsııa bóliminiń haty negizinde Oral qalasy ákimdiginiń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine shara qoldanyldy. Atap aıtqanda, QR Ákimshilik quqyq buzýshylyq týraly kodeksiniń 358-baby 2-bóligine (sý obektilerin jáne olardaǵy sý resýrstaryn lastanýdan, qoqystanýdan jáne sarqylýdan qorǵaý jónindegi talaptardy buzý, sondaı-aq sýdyń zııandy áserin aldyn alý jónindegi sharalardy qabyldamaý) sáıkes hattama toltyrylyp, 514 675 teńge aıyppul salyndy.
- Budan bólek, Oral qalasy turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine nysandy sý qorǵaý aýmaǵynan shyǵarý jóninde hat jiberildi. Oǵan qosa sý nysandarynyń jaı-kúıine áser etetin qurylymdar men nysandardy ornalastyrý, jobalaý jáne qurylysyna qatysty kelisim týraly túsinik berildi, - delingen resmı jaýapta.
Oral qalasy ákimdigi atalǵan polıgonǵa qardyń áli shyǵarylyp jatqanyn, qazirgi tańda jer telimi resimdelip jatqanyn jetkizdi.
Eske sala keteıik, budan buryn Oralda qardyń sý qorǵaý aýmaǵyna tógilip jatqany jóninde turǵyndar dabyl qaqqanyn jazǵan edik.