Oralda qarbyzdan ýlandy degen kúdikpen taǵy úsh bala aýrýhanaǵa jetkizildi

ORAL. QazAqparat – Oraldaǵy jazǵy lagerlerdiń birinde qarbyzdan ýlandy degen kúdikpen úsh bala aýrýhanaǵa tústi, dep habarlaıdy QazAqparat tilshisi.

BQO TJD baspasóz qyzmetinen berilgen málimetke qaraǵanda, búgin saǵat 11:49-da «Samal-3» shaǵynaýdanynan shaqyrtý túsken.

Balalar lagerinde qarbyzdan ýlandy degen kúdikpen 15 jáne 16 jasar úsh qyz modýldik juqpaly aýrýlar aýrýhanasyna jetkizildi. Olarǵa ótkir gastroenterokolıt dıagnozy qoıyldy.

Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, balalar kesheden beri aýyrǵan.

«Onyń aldynda birneshe bala týǵan kúnin toılaǵan. Sonda qarbyz, tort jegen. Tek úsh qyz syrqattanǵan. Jaǵdaılary qanaǵattanarlyq. Dárigerler aýrýhanaǵa jatqyzýǵa kórsetkish joq dep tapty», - dedi A. Saqposynova.

Eske sala keteıik, budan buryn Oralda qarbyzdan ýlandy degen kúdikpen tórt balanyń aýrýhanaǵa jatqyzylǵanyn jazǵan bolatynbyz.