Oralda karateden Mánshúk Mámetovany eske alýǵa arnalǵan halyqaralyq týrnır ótip jatyr

ORAL. KAZINFORM – Oral qalasyndaǵy «Jaıyq arena» sport kesheninde Keńes Odaǵynyń Batyry Mánshúk Mámetovany eske alýǵa arnalǵan X halyqaralyq «Akzhaiyk Open» WKF týrnıriniń jeńimpaz-júldegerleri anyqtalyp jatyr.

Halyqaralyq deńgeıdegi aıtýly dodaǵa Ázerbaıjan, Qyrǵyzstan, Reseı Federatsııasynyń Bashqurtstan, Tatarstan Respýblıkalarynan, Qazaqstannyń barlyq óńirlerinen 1 myńǵa jýyq sportshy jınaldy.

Bul týrnır sporttyq mańyzymen qatar batysqazaqstandyq batyr qyz — Mánshúk Mámetovany eske alý arqyly jas býynǵa patrıottyq tárbıe berýdi, dostyq pen yntymaqtastyqty nyǵaıtýdy kózdeıdi. 

Jarys barysynda BQO namysyn qorǵaǵan Álisher Taıjan (+84 kg) chempıon atansa, Álisher Jádigerov (-55 kg) pen Darhan Temirálıev (-60 kg) kúmis júldege ıe boldy.

Búgin jáne erteń jasóspirimder men kadetter arasynda kýmıte jáne kata baǵdarlamalary boıynsha myqtylar anyqtalady.

Karateden BQO-nyń aǵa jattyqtyrýshysy Rınat Merǵalıevtiń aıtýynsha, bıylǵy qyrkúıek aıynda Qytaıda jastar men kadetter arasynda Azııa chempıonaty ótedi.

- Osy jarystyń qorytyndysy boıynsha el namysyn qorǵaıtyn sportshylar irikteledi. Bıylǵy bir erekshelik, jeńimpaz-júldegerlerine qarjylaı syıaqy berilýde, - dedi R.Merǵalıev.

Eske sala keteıik, budan buryn Oralda karateden Mánshúk Mámetovany eske alýǵa arnalǵan halyqaralyq týrnır ótetinin jazǵan edik.