Oralda qarasora ósirýmen aınalysqan advokat 6 jylǵa sottaldy

ORAL. KAZINFORM — BQO qylmystyq ister jónindegi mamandandandyrylǵan aýdanaralyq sotynda advokat Tımýr Áıtıevke qatysty úkim shyqty.

Sot kabınetinen alynǵan málimetke qaraǵanda, oǵan QR QK 296-baby (esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý), 297-baby (esirtki, psıhotroptyq zattardy, sol tektesterdi ótkizý maqsatynda zańsyz ıemdený, saqtaý, tasymaldaý, olardy jóneltý ne ótkizý), 300-baby (quramynda esirtki zattar bar, ósirýge tyıym salynǵan ósimdikterdi zańsyz egip-ósirý) jáne 287-baby (qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) boıynsha aıyp taǵyldy.

Sot talqysynda anyqtalǵanyndaı, T.Áıtıev tanysy M.Bekqalıevpen birge tyıym salynǵan kannabısti (qarasora) ósirip, asa iri kólemde marıhýana alýǵa kelisken. Taýardyń bir bóligin satyp, ishinara ózderi tutynbaq bolǵan. Olar Oral qalasynyń shetinen, Derkól kentinen eleýsiz jeke úı satyp alǵan. Sybaılasy qarasora ósirý úshin ne qajet ekenin zerttep, kerekti quraldar men materıaldardyń tizimin jasaǵan. Buǵan ekeýiniń kúshi jetpeıtinin túsinip, jumysqa B.Qýanyshqalıev pen A.Aımaǵambetovti tartqan. 

Osylaısha, Áıtıev esirtki óndirýdi uıymdastyrý men qarjylandyrý, daıyn ónimdi esepteý men ótkizý jáne túsken paıdany bólý jumystaryn mindetine alǵan. Qalǵandary ósimdikti zańsyz ósirý, odan daıyn ónim alý jáne egisti kúzetýge tıis bolǵan. Olar iz jasyrý úshin jeke úıdi ózara «baza» dep ataýǵa kelisken. 

Birneshe aı boıy qylmystyq top músheleri úıdi qaıta jabdyqtap, jóndeýden ótkizgen. 2021 jyldyń mamyr aıynda Bekqalıev ınternet-dúken arqyly kannabıs tuqymy men mıneraldyq tyńaıtqyshtardy satyp alǵan. Qyrkúıek aıynda Qýanyshqalıev Aımaǵambetovpen birlesip, kannabıs ósirýdi bastaǵan. Kannabıs butalarynan marıhýana alǵan. Keıin olar 12 uńǵyly sholaq ańshy myltyǵyn, 5 atys jáne 12 travmatıkalyq oqdárisin satyp alǵan. 

2022 jyly 28 qańtarda UQK departamentiniń qyzmetkerleri top múshelerin quryqtap, úıdi tintken kezde 96 qarasora butasy, plastıkalyq bóshkeler, keptirilgen jáne keptirilmegen marıhýana salynǵan sómkeler, gashısh pen qarý-jaraq tabylǵan.

Áıtıev prokýrormen protsessýaldyq kelisimge kelip, óz kinásin moıyndady. Osylaısha, ol Qylmystyq kodekstiń tórt baby boıynsha aıypty dep tanylyp, 6 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge kesildi. Qalǵan top músheleri budan buryn túrli merzimge sottalǵan.

Sot úkimi zańdy kúshine engen joq.

Eske sala keteıik, budan buryn BQO-da zańsyz jumys istegen 10 ózbekstandyq azamatqa aıyppul salynǵanyn jazǵan bolatynbyz.